9-сентябрдиз Дербент шегьердин Расул Гьамзатован тlварунихъ галай 20-нумрадин юкьван умуми образованидин школадиз, “Лацу дурнайрин йикъар” фестивалдин сергьятра аваз, Махачкъаладай Россиядин ва Дагъустандин шаирринни писателрин са десте атана.
Ана шегьердин администрациядин векилри, Дагъустандин писателрин Союздин председателдин заместитель Марина Агьмедовади, Россиядин писателрин Союздин милли месэлайрай секретарь Валерий Латынина, “Лацу дурнаяр — Москвада” фестивалдин тешкилатчи Сергей Соколина, Азербайжанда яшамиш жезвай лезги шаир, Италияда кьиле фейи Виридуьньядин поэзиядин “Парнас-Анжело ла Веккя” конкурсдин гъалибчи Билал Адилова, Россиядин писателрин Союздин правленидин сад лагьай секретарь Геннадий Иванова, шаирар тир Кичибег Мусаева, Бийке Куланчаковади, Шагьвелед Шагьмарданова ва масабуру иштиракна.
Школадин кьуьлердайбурун ансамблдин дестедин жаванри атанвай мугьманар фуни кьел гваз къаршиламишна.
Мугьманри школадин гьаятда авай “Лацу дурнаяр” стелладал цуьквер эцигна. Инлай абур школадин Расул Гьамзатоваз бахшнавай музейдиз хкаж хьана, ана авай кьван материалриз килигна, аялри чпи кlватlнавай экспонатрикай суьгьбетна.
Ахпа мярекат школадин актовый залда давам хьана. Аялри муаллимрихъ галаз санал Расул Гьамзатован яратмишунрикай ва уьмуьрдикай гьазурнавай программа шаиррини писателри пара хушдиз кьабулна.
Марина Агьмедовади школадин директор Диляра Абиевадиз маналу программа гьазурунай, Р.Гьамзатован шииратдал аялрин рикI хьунай сагърай лагьана.
Чпин нубатдай, атанвай мугьманри аялар чпин яратмишунрихъ галазни танишарна.
Къагьриман Ибрагьимов
