Алай йисуз “Земский духтур” программадин сергьятра аваз 147 духтур кIвалахал акъвазна.
Алатай саласадиз Дагъустандин здравоохраненидин министерствода и хилен министр Жамалудин Гьажиибрагьимов Даггосмедуниверситетдин ректор Сулейман Маммаевахъ ва районрин са жерге больницайрин кьилин духтуррихъ галаз гуьруьшмиш хьана. Анал алай вахтунда чи республикада уьмуьрдиз кечирмишзавай «Земский духтур» программа веревирдна. Пешекарар районрин ва гъвечIи шегьеррин медицинадин идарайриз желб авуниз талукь серенжемрин пландин куьлуь-шуьлуьйрални акъвазна.
Совещанидал къейд авурвал, и месэла Дагъустандин Кьил Владимир Васильеван ва РД-дин здравоохраненидин регьбердин гуьзчивилик ква. Республикадин здравоохраненидин министерстводинни Дагъустандин госмедуниверситетдин саналди тир чалишмишвилерин нетижада эхиримжи вацра 50-далай виниз духтурар кIвалахал желбнава. Къенин юкъуз, Жамалудин Гьажиибрагьимова лагьайвал, вири санлай 147 духтур ва 9 фельдшер кIвалахал акъвазнава. Йисан эхирдалди 224 пешекар ва 10 фельдшер кIвалахдик кутун пландик ква.
Идалайни гъейри, министрди къейд авурвал, уьлкведин амай регионрив гекъигайтIа, федеральный и программа Да-гъустанда уьмуьрдиз кечирмишунин нетижаяр писбур туш. Рекъемри и кардин шагьидвалзава: 2012-йисалай Дагъустандин хуьрерин больницайра 1080 пешекар кIвалахал акъвазна.
Министрдин гафаралди, программадин нетижа медицинадин къуллугъчияр желб авунив чкайрал гьикьван мукьуфдивди эгечIзаватIа, гьадалайни аслу я. Ведомстводин кьили больницайрин регьберрал и рекьяй кIвалах мадни активламишун тапшурмишна.
Совещанидал мадни къейдна хьи, ДГМУ акьалтIарзавай гадайрихъни рушарихъ галазни кIвалах активнидаказ давамарда. Жегьил пешекаррихъ галаз тематический гуьруьшар кьиле тухуда ва анра РД-дин здравоохраненидин министр Ж.Гьажиибрагьимовани иштиракда.
«Лезги газет»
