Им фад хьайи кар я. Дагълух са хуьре гзаф дугъри, секиндиз вичин кьил хуьзвай эгьли итим яшамиш жезвай. ТIварни Сункъуьлуь тир. Вучиз ятIани, адаз вирида “Лам” лугьудай. Садани тIвар кьуна эвердачир.
И кар Сункъуьлуьдиз гзаф кIамаз тир. Адан рикIе залан хер авай. Вич дустари, чирхчирри негьзавайди гьиссзавай.
ЛакIабар гилани гзафбуруз язава. Амма “Лам” лакIаб?.. Кесибдин чара атIанвай… ГьикI ятIани, са сеферда суст хьанвай адаз ахварай вичихъ галаз маса дуьньядай атанвай ксар рахаз акуна. Абур гзаф милайим тир. Сункъуьлуьди абуруз вичин дерт ахъайна. Абуруни касдиз беябурчивилин лакIаб гьикI алуддатIа меслят къалурна… Ам, ягъайди хьиз, ахварай аватна, вичиз регьят хьанвайди гьиссзавай. “Гила заз садавайни лам лугьуз жедач”, — фикирзавай вичи-вичикди. Дамах-чахмахна, кIваляй кимел рекье гьатна ам. Рекье гьалтай хуьруьнвияр, адаз салам гуз, алатиз физвай, садани лакIаб язавачир. Ингье агакьна кас кимелни.
— Саламалейкум, жемятар, — салам гана ада кимел ацукьнавай эгьлийриз.
— Алейкум-салам, Лам, — гафар галукьна адан япарихъ. Пара пис хьана касдиз гилани.
— Куьне заз Лам вучиз лугьузва? Накь ахварай маса дуьньядай зи патав атай мугьманри а лакIаб залай алудна хъфена.
— Ваъ, гьа, тек са чи хуьруьн агъсакъалрилай гъейри валай а лакIаб алуддай ихтияр садазни авайди туш. Вассалам, шут тамам.
Сункъуьлуь, цIайлапанди ягъайди хьиз, элкъвена кIвализ хъфена. Чара атIанвай ада са фенд къурмишун кьетIна.
“Гьерер, уьндуьшар, верчер, малар захъ ава, пулунин дарвални авач. Ички чехирни туьквенда бул я. Хуьруьнвийриз са хъсан къунагълух авуна, зи лакIаб алудиз тада”, — кьетIна ада.
Ингье хуьруьнвияр — кимик квайбур вири Сункъуьлуьдин кIвализ илифда.
Сагърай, Сункъуьлуь стха, лугьуз, вирида кефер хкудзава. “Къедалай кьулухъ, Сункъуьлуь стха, ви лакIаб “лам” яз амукьдач, назикдиз, хушдиз ван къведай “ШукIва” жеда!” лагьана. Шад хьана Сункъуьлуь, эхирни вич бизарзавай лакIабдикай азад хьана лугьуз.
Къунагълух куьтягь хьана, мугьманар хъфена. Сункъуьлуь вичелай рази яз амай.
ГьикI хьана, итим, заз вун пара шад, рази яз аквазва хьи? — хабар кьазва папа. Итимдивай гаф хуьз хьанач:
— Заз мад лам лугьумир, паб. Залай а лакIаб алуднава.
— ГьикI?
— ГьакI. Заз гила “ШукIва” лагь.
— Ахмакь келле, са йисалай ШукIвадикай мад лам жезвачни?!.
Сункъуьлуьдихъ хълагьдай гаф амукьнач…
Эдуард Багъишев, Дагъустандин халкьдин артист
