Россиядин халкьарин садвилин сува­рин мярекатрин сергьятра аваз Да­гъустан Республикадин Кьил Сергей­ Меликова меркездин Дуствилин  кIва­ле гьар са хиле тафаватлу хьайи да­гъус­танвийрив государстводин шаба­гьар вахкана.

Шабагьар вахкайбурун арада армияда къуллугъзавайбур, образованидин ва культурадин деятелар, духтурар, государстводин къуллугъчияр ва жемиятдин векилар авай.

Региондин Кьили кIватI хьанвайбуруз Россиядин халкьарин садвилин сувар тебрикна ва гьа са вахтунда къейдна хьи, халкьарин садвилин югъ Россиядин гзаф миллетрикай ибарат халкьдин алакъаяр мадни сад ийизвай лишан я. Уьлкведин тарихда чи халкьари тежер хьтин четинвилериз дурум гана ва гъалибвилер къазанмишна.

«Вири вахтара Ватандиз вафалувал къалурунин, адан итижар хуьн патал майдандиз экъечIунин ерияр чи уьлкведин аслу туширвал хуьнин умудлу бинеяр я. Кьуд асир идалай вилик жуьреба-жуьре динриз къуллугъзавай халкьарин векилри халисан ватанпересвилелди, чпин садвал къалурна. Абурун садвили ва тупламишвили дяведин — къиргъиндин вахтунал эхир эцигдай ва уьл­кве чапхунчийрикай азаддай, державадин бинеяр мягькемардай мумкинвал гана», — тарихдин делилар рикIел хкана Сергей Меликова.

Ада къейд авурвал, улу-бубайрин гъалибвилер гуьгъуьнин несилрини са шумуд сеферда тикрарна. Дявейриз, четинвилериз килиг тавуна, Ватандин абадвал артухарна.

«Къе Ватандин итижар хуьзвай чи гьар са ватанэгьлидал чна дамахзава. Ватан хуьзвайбур кIеве гьат тавун патал чна абуруз вири патарихъай куьмек гузва ва инлай кьулухъни абурун месэлаяр гьялда. Важиблуди ам я хьи, да­гъустанвийри гьар сада (инженер, духтур, муаллим…) вич алай чкадал зегьмет чIугвазва, ватандиз къуллугъзава. Гьа идалди чна вирида гъалибвал мукьва ийизва. Къе чна садвилин, ватанпересвилин ва Ватандиз, чандилайни гъил къачуна, къуллугъ авунин адетар давамарзавай республикадин агьалийриз государстводин шабагьар гузва», — лагьана региондин Кьили.

Разивилин, баркаллувилин кьетIен гафар ада «Каспий» батальондин махсус серенжемда иштиракзавай гуьгьуьл­лубурун гьакъиндайни лагьана.

«Дяведин женгер кьиле физвай майданда, душмандин далу пата, рейдар кьиле тухудайлани, миллетбазрал гьужумдайлани, чи кьегьалри чпин вилик эцигнавай везифаяр къагьриманвилелди тамамарзава. Мегьамед Абдулхали­кьов, Игорь Деревянко, Надир Исакьов­, Замир Исмаилов, Марат Кушиев ва гзаф маса гуьгьуьллубурни виридаз чешне я.

ГьакIни заз къе уьтквемвилелди къул­лугъзавай Тарлан Назиров, Магьир Рамазанов, Жалалдин Рабазанов къейд ийиз кIанзава. Руьгьдин эмирдалди абуру дирибашвилин, жуьрэтлувилин, Ватандиз вафалувилин рехъ хкянава».

Региондин Кьилин гафаралди, милли итижар абуру хсуси чанни къурбанд авуналди хуьзва, халис игитвал къалурзава.

«Чна квел рикIивай дамахзава ва куьн рикIел алаз ватандиз вафалувилелди, дирибашвилелди къуллугъзавай Россиядин вири аскерриз сагърай лугьузва», — лагьана республикадин регьберди, СВО-дин иштиракчийрихъ эл­къвена.

Сергей Меликова къейд авурвал, женгерин майданда хьиз, игитвал зегьметдани къалурзавайбур ава. И кардин гьакъиндай медицинадин къуллугъчийри кIвалахзавай тегьерди шагьидвалзава. Абуру женгера хирер хьанвай аскерарни, гьакI ислягь агьалиярни сагъар­ хъийизва. Къе шабагьар гузвайбурук Дербент шегьердин центральный больницадин духтур Заира Куьребегова, Гуниб райондин центральный больницадин чIехи медсестра Рейгьанат Мегьамедова ква. Дагъустандин регьберди чпин везифаяр тирвал кьилиз акъудзавай дишегьлийриз баркалла лагьана.

Сергей Меликова образованидин, илимдин хел вилик тухузвай инсанрин кIвалахни къейдна. Абурук Дагъустандин педуниверситетдин профессор Империят Халипаева, Дагъустандин медицинадин университетдин  травматологиядин кафедрадин заведующий Асадула Гьуьсейнов (ам цIийивилерин 38 патентдин автор я) акатзава.

«Халкьар сад авунин карда культурадихъ, искусстводихъ еке метлеб ава. И рекьяй зегьмет чIугвазвай юлдашризни государстводин шабагьар гана. Санлай къачурла, лайихлу тIварар, РД-дин гьуьрметдин грамотаяр, тIвар кхьенвай сятер 40 дагъустанвидив вахкана.

Хийир  Эмиров