Яшайишдин ­сиясат патал

Дагъустандин бюджетдин саки 60 процент яшайишдин сиясат патал­ ра­къур­да. Идакай, республикадин премь­ер-министр Абдулмуслим Абдулмуслимован гафарал асаслу яз, РД-дин гьуку­матдин телеграм-каналди хабар гузва.

Чиновникдин къейдерай малум жезвайвал, бюджетдин харжийрин статьяй­рин арада кар алайди яз яшайишдин сия­сат амукьзава. И макьсадриз вири­ харжийрин статьяйрин 56 процент чара авун пландик кутунва. Гьавиляй­, бюд­жетдин­ сер­­гьятламиш хьунриз ва эксиквилизни килиг тавуна, пландик кутазвай пуд йисан бюджет­ яша­­йишдин хел фикирда­ кьунвайди, адан макь­сад­ни эвелни-эвел агьалийрин яша­йишдиз талукь заминвилер таъминарун я.

Хабар гузвайвал, сифте чкадал эцигнавай кьилин месэлайрин сиягьдик агъадихъ галай серенжемар акатзава: бюджетдин хиле кIвалахзавайбурун мажибар галай-галайвал хкажун; яша­йишдин выплатайрин кьадарар индексация авун, «гъил агакьдай» (доступный) медицинадин куьмекдалди таъминарун, дарманар маса къачун ва яшайишдин хилез талукь маса месэлаяр гьялун.

Гьа са вахтунда, телеграм-канал­ди, Абдулмуслим Абдулмуслимован га­­­фарал асаслу яз хабар гузвайвал, 2025-йис патал чпиз яшайишдин рекьяй тайин­ кьезилвилер талукь тир агьалияр дарманралди таъминарун патал 2,4 миллиард манат чара ийида.

Идалайни гъейри, агьалийриз яша­йишдин жигьетдай куьмек гун яз, чилин­ участокрал кьван газ тухунин кIва­ла­хар (догазификация) кьилиз акъудунин­ ва кIвализ газдин тадаракар маса къачунин серенжемар патал 30 миллион манат фикирда кьунва.

Дуьдгъвердин гьакъиндай баян

Дагъустанда дуьдгъвер гьасилун агъуз аватунин къурхулувал авачир­ди къейдна. Идакай «Да­гъустандин экономика» телеграм-каналди хабар ­гузва.

Чешмеди кхьизвайвал, дуьдгъвер гьасилунал машгъул еке карханайри и метягь «агакьарунин кар» акъвазаруникай раижнавай хабар федеральный дережада аваз активнидаказ веревирдзава. Къейдзавайвал, и кардин себеб нек бес кьадар тахьун я.

Чешмеди кхьизвайвал, гьа са вахтунда «Дагъустандин экономика» те­ле­г­­рам-каналди са шумуд карханада­ ха­барар кьун тешкилайла, малум хьайи­­вал, республикада дуьдгъвер «ага­кьа­рунин кар» акъвазардай планар авач. Мисал яз, «Дарман» заводда хабар­ гайи­вал, абуруз герек тир материал­ (сырье) бес жезва, чIем гьасилунин кIва­­­лах акъваз жезвач.

Чешмеди кхьизвайвал, РД-дин хуьруьн майишатдин ва недай суьрсет­дин­ министерстводин делилралди­, 2024-йисуз­ республикада 300 тонн­ди­лай­ виниз дуьд­гъвер гьасилнава. Министерстводи къейд авурвал, регионда и кардал, еке заводрилай гъейри, гьакIни гъвечIи метягьдин фермаяр ва КФХ-ярни машгъул жезва.

Къейд ийин хьи, и месэладин гьа­къин­дай РД-дин хуьруьн майишатдин ва недай суьрсетдин министерстводин телеграм-каналдани баян ганва. Чешмеди раижзавайвал, уьлкведин регионра, гьа жергедай яз Дагъустандани, дуьдгъвер гьасилунин кьадарар тIимил хьун вилив хуьзвач.

Ведомстводин делилралди, алай йи­суз чкадин метягь акъудунал машгъулбуру гьеле 221 агъ­зур тонн дуьд­гъвер гьасилнава, Да­гъустанда ла­гьай­тIа акъуднавай и жуьредин чIеме­дин кьадар 307 тонндилай артух я.

Гьазурайди — Муса  Агьмедов