Хизан кутун регьят кар я, амма хизан кьиле тухунихъ, хуьз алахъунихъ са бязи ялунарни гала. Абурун нетижаярни са кьадар уьмуьр кечирмишайла аквада. Къенин зи ихтилат 46 йисуз санал яшамиш хьанвай, чпин мукай тербиялу кьуд велед акъудунилай гъейри, цIудралди несилриз тербия ва чирвилер ганвай муаллимар тир  Исмихановрин хизандикай фида. И макъалада заз фикир вичин уьмуьрдин юлдашдиз даях хьайи, играми диде лагьай багьа тIварцIин сагьиб Умразият Шихагьмедовнадал желб  ийиз кIанзава.

Умразият Шихагьмедовна 1953-йисуз Кьасумхуьрел бухгалтердин хизанда дидедиз хьана. Хайи хуьруьн мектебда муьжуьд класс акьалтIарай жегьил Махачкъаладин медучилищедиз гьахьна. Училище акьалтIарай пешекарди вичин зегьметдин рехъ Алкьвадрин хуьруьн ФАП-да медсестра яз башламишнай. Са йисалай кьисметди ам Советский хуьруьз акъудна. Эвленмиш хьайи жегьилар, кIелунар давамар хъийиз, вахтуналди Махачкъаладиз куьч хьана. Уьмуьрдин юлдаш Намедин Сейфединовича ДГУ-дин физикадинни математикадин факультетда кIелзамай.

Хизандин жавабдарвал хиве гьатай Умразият  Шихагьмедовнадивай вичин мурад тир хирургвал кIелиз хъхьаначтIани, ада гуьгъуьнлай ДГУ-дин биологиядин факультет акьалтIарна. Жегьилри зегьметдин рекьер гьарна башламишнатIани, са вахтунилай абур чпин хизандин бине кутур  Советский хуьруьз хтана, юкьван мектебда кIвалахдив эгечIна. Намедин Сейфединовича математикадин ва Умразият муаллимди психолог яз башламишай зегьмет къенин юкъузни давам жезва. Тарсар гайи цIудралди несилри абуруз чухсагъул лугьузва. Кьведни ругуд аял авай чIехи хизанрай акъатнавай, хизандин къиметлувиликай хабар авай абуру чпизни кьуд веледдикай ибарат мягькем хизан ку­туна.

КIвалахдин рекьяйни чпин алакьунар ва чирвилер къалурай Намедин ва Умразият Исмихановрин зегьмет гьуьрметдин грамотайралди лишанлу авунва. Намедин Сейфединович “РД-дин образованидин отличник” тIварцIин сагьибни я. Тарс гузвай аялрин ва абурун диде-бубайрин патай абуру еке гьуьрмет къазанмишна. Хуьруьн уьмуьрдикай са юкъузни къерех хьанач. Масадан дердиникай хабар кьадай, алакьдай куьмекар гудай, гъвечIи-чIехи чидай и хизанда еке хьанвай веледарни хуьр, кIвал, жемят патал лайихлу инсанар хьана.

Алатай йисуз абурун хва Заур Намединовичаз “Россиядин Федерациядин образованидин Гьуьрметлу работник” лагьай тIвар ва хурудал гьалддай знак гана. Велед жувалайни вилик фин гьар са диде-бубадин мурад я.

Заур Намединович ДГУ-дин информатикадин ва информационный технологийрин факультетдин декан, экономикадин илимрин кандидат, информациядин технологийринни экономикадин процессрин моделар туькIуьрунин кафедрадин доцент я. Муькуь хва Марсела, майордин чинда аваз, Самарадин УФСИН-дин медицинадин къуллугъдин начальник яз, пуд лагьай хва Сейфедина Чепелрин заставадал военный яз ва руш Диларади Калининграддин областдин реабилитациядин центрада тербиячивиле зегьмет чIугвазва.

Абуру Умразият дидедизни Намедин бубадиз 12 хтул багъиш­на­ва. Умразият дидеди лугьузвайвал, балаяр, хтулар адаз уьмуьр­да виридалайни багьа пишкеш я. Гатун вахтунда веледар­, хиза­нарни галаз хтана, кIвализ кIватI жезвай легьзеяр ада виридалайни бахтлубур яз гьисабзава.

Ихьтин чешнелу хизан кутунвай Исмихановриз аферин, чухсагъул лугьуз кIанзава. Гьикьван итимдин бармак, жавабдарвал, зегьмет чIехи ятIани, хизандин далу пад мягькемарзавай дишегьлидилайни гзаф крар аслу я. Иллаки и хизанда тарифлу свас, вафалу юлдаш, играми диде хьайи Умразият дидедин зегьмет кьетIендиз къейд тавуна жедач.

Къуй балайрилай квез анжах шад хабарар атурай, къуй бахт­лу легьзеяр куь уьмуьрда мукьвал-мукьвал тикрар хьурай,  гьуьрметлу Умразият Шихагьмедовна!

А.Айдемирова