Ислен юкъуз Кьиблепатан Сухокумск шегьерда Дагъустан Республикада ракъинин виридалайни чIехи электростанция ачухна. Ракъинин 40 агъзур модулдикай ибарат ада, санлай къачурла, 30 гектардин майдан тешкилзава, хабар гузва РД-дин Гьукуматдин пресс-къуллугъди.
Проектдин инвестор ва генеральный пудратчи “Хевел” компанийрин дестедин къурулушар хьана — проект уьмуьрдиз кечирмишун патал 1,5 миллиард манат серфнава. Ракъинин къуват электроэнергиядиз элкъуьрзавай цIийи объект электричестводалди таъминарзавай сетдин къурулушдик “Россетар Кеферпатан Кавказ” компаниядин пешекарри кутунва.
“Дагъустан Республикада Кьиблепатан Сухокумскдин 15 МВт-дин гужлувилин ракъинин электростанция — регионда ракъинин энергиядикай электричество гьасилзавай зурба сад лагьай объект ачухунин шад мярекат кьиле фена. Станция 40 агъзур модулдикай ибарат я ва 30 гектардилай гзаф тешкилзава — икьван чка футбол къугъвадай 40 майдандиз барабар я”, — къейдзава пресс-къуллугъди.
Гуьзлемишзавайвал, йиса тахминан 20 миллион кВт/сят электроэнергия гьасилда. Ида гьавадиз гадарзавай углекислый газдин кьадар йиса 7 агъзур тонндин тIимилардай мумкинвал гуда. Проект уьмуьрдиз куьчуьрмишдайла, эцигунарзавай вахтунда жедай кIвалахдин цIийи тахминан 60 чка, гьамиша жедай 13 чка арадал гъанва.
“Ракъинин гужлувиликай электроэнергия гьасилдай цIийи объектар кардик кутуни Дагъустан экономикадин рекьяй дурумлудаказ виликди фин таъминарда, муьштерияр электроэнергиядалди атIунар авачиз таъминариз, гьакIни региондин вичиз тешпигь авачир тIебиатдин шартIар хуьз куьмекда”, — гьисабзава пресс-къуллугъди.
РД-дин Гьукуматдин Председатель А.Абдулмуслимова къейд авурвал, эхиримжи сеферда республикадин мулкунал энергия гьасилунихъ галаз алакъалу цIийи объектар муьжуьд йис идалай вилик кардик кутунай.
Чи мухбир
