Чи ватанэгьлияр — гьар сана
Кьисметди ватандивай яргъариз акъуднавай ватанэгьлийрикай куьруь малуматар гун давамарзава чна. И сеферда чи ихтилат алай вахтунда Краснодардин крайдин халкьдин образованидин ва илимдин къуллугъчийрин профсоюздин тешкилатдин председателдин заместителвиле кIвалахзавай Экверхан Валегьович Сурхаевакай я.
Ам 1973-йисан 28-октябрдиз Ахцегь райондин Фиярин хуьре дидедиз хьана. Алай вахтунда ам вичин хизанни галаз Краснодарда яшамиш жезва. 1994-1999-йисара ада Кубандин гьукуматдин университетдин физикадин факультетда кIелна. Къецепатан чIаларикай адаз немс чIал хъсандиз чизва.
Экверхан Сурхаев Краснодардин крайдин профсоюздин тешкилатдин президиумдин, крайдин сад авунвай профсоюзрин тешкилатрин советдин, Краснодардин крайдин образованидинни илимдин министерстводин аттестациядин комиссиядин член я.
Жегьил пешекар яз, Экверхан Сурхаева вичин зегьметдин рехъ 1994-йисуз “Краснодарэлеваторспецстрой” АООТ-да монтажниквиле кIва-лахунилай башламишна. Гуьгъуьнин йисара ада жуьреба-жуьре идарайра кIвалахна ва пешекарвилин рекьяй тежриба кIватIна. 2001-йисуз адакай Кубандин гьукуматдин университетдин сифтегьан студентрин профсоюздин тешкилатдин председателдин заместитель, 2002-2014-йисара и тешкилатдин председатель хьана.
Ватанэгьлидин алахъунарни агалкьунар образованидин рекьяй федеральный агентстводи, РФ-дин образованидинни илимдин министерстводи, Краснодардин крайдин образованидинни илимдин министерстводи гьуьрметдин грамотаяр, чухсагъулдин чарар гуналди къейднава. Ам “Россиядин профсоюзрин 100 йис” юбилейдин медалдин ва профсоюздин центральный советдин, Краснодардин профсоюздин цIудралди грамотайрин сагьиб я.
Краснодарда яшамиш жезвай чи дуст, Госдумадин депутатдин куьмекчи, блогер Заур Балакшиева къейдзавайвал, Экверхан Сурхаев лезгийриз талукь милли мярекатра гьевесдивди иштиракзавай, месэлаяр гьялуник вичин пайни кутаз алахъзавай ватанпересрикай сад я.
Экверхан Валегьовичан хизанда пуд велед ава — кьве рушни са хва. Чаз абурухъ сагъламвал ва еке агалкьунар хьана кIанзава. Халкьди чпел дамахдай лайихлу векилар къуй чахъ гзаф хьурай!
К.Ферзалиев
