Дикдик
Шикилдай аквазвай ажайиб ва гуьрчег гьайван миргерин (антилопа) лап гъвечIи жуьрейрикай сад я. Абурун кьакьанвилел 30-40 сантиметр жеда, яргъивилел — 50-70. Заланвал — вини кьил 6 килограммдив агакьда. И гьайванар Африкадин баябан чкайра, къумлухвал квай мулкара яшамиш жезва. Абурун кьуд жуьре малум я.
Дикдикар экуьнахъни нянихъ гзаф гьерекатдик жедай гьайванар я. Йикъан чими вахтунда абур кIачIичIлух чкайра, кул-кусрик жеда. Абуру анжах векь тIуьналди уьмуьр кьиле тухузва.
ТIебиатда и гьайванрин уьмуьр 10 йисал кьван давам жезва. Дикдикрин душманрик чIехи гъуьлягъар, лекьер, еке чурчулар, асланар, лекьенар, къаракъулахар, чIурун кацер ва маса вагьшияр акатзава.
«Лезги газет»
