Махачкъалада полициядин къуллугъчийри велосипед чуьнуьхунай шак физвай агьали кьуна. Идакай РД-дин МВД-дин пресс-къуллугъди хабар гузва. Махачкъала шегьердин Советский райондин полициядин отделдиз 39 йисан яшда авай агьали арза ийиз атана. Ада малум тушир касди вичин электровелосипед чуьнуьхнавайдакай хабар гана. Велосипед 130 агъзур манатдин къимет авайди я.
Шегьерра велосипедар чуьнуьхзава лугьудай ванер чи япарихъ гагь-гагь галукьзава. Тажуб жедай кар туш, угърийрин темягь иллаки багьабурал физва.
Кьабулай серенжемрин нетижада полицейскийрилай шак физвай кас кьаз алакьна. Ам 67 йисан яшда авай чкадин агьали тир. Вичи авур нагьакьан кар ада хиве кьунва.
Шак физвайда ихтилатайвал, куьчедал иеси патав гвачир велосипед акурла, гьасятда ам чуьнуьхна ва гьалтай касдиз 2 агъзур манатдай маса гуз алахъна. Угъривилин алакьунар авайтIани, савдагарвилин алакьунар кьуьзекахъ авачиз хьана — адавай «метягь» маса гуз хьанач. КIвализ хъфей ам гуьгъуьнлай полицейскийри кьуна.
«Лезги газет»
