Кьасумхуьрелай Кьурагьиз физвай рекьин къерехда, куьгьне ДаркIушрин мулкуна, ажайиб тарихдин булах ава. Гзафбуру адаз «ДаркIуш булах» лугьузва. Булахдин халис тIвар «Хвар булах» я. Ам чешмедилай рекьин къерехдиз ханарин девирда фекьи Сайидагьмеда, къванерин арада туна, гъанай лугьуда.
Йисар къвез фена, булахдизни куьмек герек атана. И кар кьатIай М.Кичибегова 1966-йисуз ам хуьруьнвийрин куьмекни галаз туькIуьр хъувунай.
1995-йисуз и булах вичин харжидалди а чIаван ДаркIушрин юкьван мектебдин директор С.Савзиханова туькIуьр хъувуна.
– «Хвар булах» зи чIехи бубади гъайиди я, туькIуьр хъувун зи хиве ава», — лагьана ада.
2000-йисуз булах мад чIуру гьалда авайди акурла, «Даркушский» колхоздин председатель А.Керимова ам туькIуьр хъувун кьетIна. И кар патал ада кIалубдин 220 къван, цемент маса къачуна, 60 метрдиз турбаяр тухвана, булахдал латни эцигна. Адан вилик малариз яд хъваз регьят жедайвал кьве метрдин гьяркьуьвал аваз чиле бетон цана. И карда адаз, устIарар ва фялеяр яз, хуьруьнвийри куьмекна.
И мукьвара булах цIийикIа туькIуьр хъувун мад муаллим С.Савзиханова гъиле кьуна. Ада авай булахдик мад са чешме акал хъувуна, патав гвай чумурар, валар атIана, лат михьна. Лазим затIар Савзихан муаллимдин хуьруьхъ рикI кузвай хва Халидина маса къачуна. Яд гзаф хьайила, булахдал мешреб атана. Ам туькIуьр хъийидайла, Савзиханов Савзихана, Керимов Масидина, Савзиханов Халидина, Мурадов Абдулназира ва и цIарарин авторди рикIивай зегьмет чIугуна.
Булахдал атай гьар сада ам туькIуьр хъувурбурун тIварарихъ дуьаяр ийизва, абуруз сагърай лугьузва.
Эйзудин Сайдумов
