Тогодикай итижлу делилар
— Того РагъакIидай патан Африкада авай гъвечIи ва кесиб уьлкве я. Адан умуми майдан 56785 квадратный метрдикай ибарат я.
— Жуьреба-жуьре девирра алай аямдин Тогодин мулкар Португалиядин, Германиядин, Великобританиядин ва Франциядин гуьзчивилик квай.
— 1960-йисуз Тогодихъ Франциядилай аслу туширвилин дережа хьана.
— Дуьньядин лап чIехи базаррикай сад Тогодин меркез тир Ломе шегьерда ава. И базарда маса тагузвай затI авач, гьатта крокодилдин кьурурнавай келлеярни къачуз жеда.
— Кара ва Сокоде Тогодин чIехи шегьерар я.
— Уьлкведа анжах 2 университет кардик ква.
— Тогода 8,5 миллиондилай гзаф инсанар яшамиш жезва.
— Уьлкведа француз чIал кьилинди я.
— Тогодин агьалийрикай 29 процент хашпересар я, 20 процент — мусурманар. Амайбуру жуьреба-жуьре динриз ибадатзава.
— ЧIехиди тушир Тогодин мулкара тахминан 45 миллет яшамиш жезва.
— Тогода гьава зегьемлуди жеда.
— Уьлкведин мулкара булдалди экъечIзавай баобабрин емишар инсанри недай-хъвадай затIарик кутазва.
— Тогодин мулкарин 10 процент тамари кьунва.
— Тогода итим хизандин кьил я ва ам баобаб тарцин сериндик къаткун герек я. КIвалин вири кIвалахар адан папари ийизва. КIвалера, никIера гзаф кIвалахар авайвиляй Африкада итимрихъ са шумуд паб жезва. Итимар гзаф кагьулбур яз гьисабзава.
— Тогода балугъчивал ва хуьруьн майишатдин маса хилер гзаф машгьур я.
— Тогодин виридалайни кьакьан чка Агу (987 м) дагъ я.
— Уьлкве кесибди я, амма тIебиатдин мумкинвилери адаз хийир гузва: агьалийриз чими парталар, кIвалер чими авун герек жезвач, недай-хъвадай затIар лагьайтIа, гьар са чкада йисан кьиляй-кьилиз экъечIзава.
«Лезги газет»
