Кениядикай делилар

—        Кения туристрин фикир виридалайни гзаф желб­завай Африкадин уьлкве я.

—        Кениядин меркез Найроби дуьньядин лап хаталу шегьеррин сиягьдик акатзава.

—        Суахили чIалан бине Кениядихъ галаз алакъалу я.

—        Кениядин умуми майданди 580367 квадратный километр кьазва.

—        И уьлкведин пул кенийский шиллинг я.

—        Кенияда 57 миллиондилай гзаф агьалияр яшамиш жезва.

—        Кения виликдай Великобританиядин колония тир. 1963-йисуз аникай аслу тушир уьлкве хьана. Алай вахтунда Кения Африкадин йигин еришралди еримлу жезвай уьлквейрик акатзава.

—        Кениядин агьалийриз государстводин кьве чIал ава: ингилис ва суахили. Амма халкьдин чIехи пай суахили чIалал рахазва.

—        И уьлкведа 59 къурух ва милли паркар ава.

—        Антропологиядин ва археологиядин рекьяй пешекарри  тухванвай ахтармишунрал асаслу яз, инсани­ятдин цивилизация сифте яз Кенияда туьретмиш хьана­.

—        Майдандал гьалтайла, Кенияда авай Виктория вир планетадал алай уькIуь туширбурукай кьвед лагьайди я. Вирин яргъивилел 402 километр ала, гьяр­кьуь­вилел — 322 километр. Викториядин виридалайни дерин чка 80 метрдиз барабар я.

—        Кенияда авай Масаи-Мара паркунин патав тара­рин кукIвара эцигнавай мугьманханадин нумраяр ава.

—        Кенияда йисан вахтар чина хьиз кьуд ваъ, кьвед ава: марфарин ва кьурагь вахтар.

—        И уьлкведа тIебии газ ишлемишзавач.

—        Кения гьайванралди, къушаралди гзаф девлетлу чка я. Ана яшамиш жезвай нек хъвазвай гьайванрикай 39 процент, къушарикай 36 процент маса чкайра гьалтзавач.

—        1950-йисарин эхирра Кенияда виридалайни кьакьан жираф дуьздал акъудна. Рекордсмен-жирафдин кьакьанвилел 6,1 метр алай. Икьван кьакьан жираф мад малум хьанвач.

—        Кениядин тIвар гьа ихьтин тIвар алай къадим вулкандихъ галаз алакъалу я. Кьакьанвилел гьалтайла, къадим Кения вулкан Африкадин кукIушрикай кьвед лагьай чкадал (саки 5200 метр) ала.

«Лезги газет»