Гвинеядикай итижлу делилар
— Гвинея Республика Африкадин са акьван еке тушир уьлкве я. Анин умуми майданди 246 агъзур квадратный километр кьазва.
— Гвинеядин агьалийрин умуми кьадар 12 миллионни зурав агакьнава. Уьлкведин агьалийрин кьудай са пай анин меркез Конакрида яшамиш жезва.
— И уьлкведа френг чIал кьилинди яз гьисабзава. Адалайни гъейри, чкадин рахунрин чIалар ишлемишзава.
— Гвинея целди тамамвилелди таъмин туштIани, анай Африкадин 14 уьлкведиз яд ракъурзава.
— Гвинеяда накьвадин ранг къати ярувални туракьвал квайди я.
— Гвинея дуьньядин виридалайни кесиб 10 уьлкведик акатзава. Гьа са вахтунда анин вири мулкар алмасар, къизилдин уран, гьатта нафт квай чкаяр яз гьисабзава.
— Россиядилай Гвинеяда бананрин къимет багьа я.
— Ина спортдин виридалайни машгьур жуьре столдин теннис я. Гвинеяда футболдин майданрин кьадарни тIимил туш.
— Гвинеядин агьалийриз михьивал пара кIанда.
— Са чIавара гьайванралди девлетлу хьайи и уьлкведа исятда лекьенар, филер, маймунрин бязи жуьреяр саки терг хьанва.
— 1974-йисалди и уьлкведа “рагъакIидай патан медицинадал” къадагъа алай. Вири азарар халкьдин медицинадин такьатралди сагъарзавай. Исятда адетдин медицинадал къадагъа алачтIани, и жигьетдай ана гьалар зайиф я.
— И уьлкведин агьалияр асул гьисабдай хуьруьн майишатдин кIвалахрал машгъул я.
— Гвинеядин мулкарикай хейлин чкаяр чIехи тушир дагъларини кIунтIари кьунва.
«Лезги газет»
