Утконос Австралияда яшамиш жезвай итижлу гьайванрикай сад я. Адал уьрдегдин­ хьтин кlуф алайвиляй ихьтин тlвар акьалт­нава­. Алимриз сифте яз утконосдин хам акурла, абуруз ам са ни ятlа зарафат патал кlуф цванвай хундуздин хам хьиз хьанай. Гуьгъуьнлай Англиядин ботаник ва зоолог Жорж Шоуди а хам а вахтунда илимда малум тушир гьайвандинди тирди субутна. Европавияр и гьайвандихъ галаз таниш яз 200-лайни гзаф йисар я. Амма алимри исятдани и гьайвандикай ажайиб, цlийи делилар раижун давамарзава.

Ингье утконосдикай са бязи итижлу делилар:

1. Алимри инсанриз утконос раижайдалай кьулухъ 27 йисан къене и гьайван гьи жинсерик кутадатlа тийижиз амай. Гуьгъуьнлай немсерин биологди ам нек хъвадай гьайванрикай тирди успатна.
2. Диши утконосри къушари ва я хур гал­чlуриз фидай гьайванри хьиз какаяр хазва­.
3. Нек хъвадай гьайванрикай электричестводин сигналар кьабулиз жедайбур анжах кьвед ава, абурукай сад утконос я.
4. Эркек утконосар зегьерлу я.
5. Утконосар кьел квачир це яшамиш жезва. Кьел квай ятара абуру садрани сирнавзавач.
6. Утконосди тапасрин куьмекдалди чилни эгъуьнзава, це сирнавни ийизва.
7. Утконосар тахминан 10 йисуз кьван яшамиш жезва.
8. Гьар йисуз и гьайванар 5-10 юкъуз члада жезва.

Гьазурайди — Куругъли Ферзалиев