Январдин эхирра мергьяматлувилин “ЛЕКИ” фондуни Ахцегь райондин Хуьруьгрин хуьре, “Люминари”центрада, мектебра кIелзавай аялрин арада химиядай кьвед лагьай сеферда олимпиада кьиле тухвана. Ана Кьиблепатан Дагъустандин районрин 28 мектебдай 9-классра кIелзавай аялри иштиракна.
Нетижада 1-чка Докъузпара райондин Усугъчай хуьруьн юкьван мектебдин ученица Зиният Агьмедовади кьуна. 2-чкадиз СтIал Сулейманан райондин Кьасумхуьруьн 1-нумрадин юкьван мектебдин ученик Ассад Шихрагьимов ва 3-чкадиз Кьасумхуьруьн 2-нумрадин юкьван мектебдин ученица Абидат Селимова лайихлу хьана. Гъалибчийриз дипломар, пулдин пишкешар ва маса савкьатар гана.
Фондунин векилри мярекат хъсан дережада аваз кьиле тухуз куьмекар гайи РФ-дин умуми образованидин гьуьрметлу къуллугъчи Фахредин Уружеваз, МФТИ-дин умуми физикадин кафедрадин доцент Азим Нуьгьоваз, “Люминари” центрадин администратор Раиса Демировадизни марифатдин программайрин руководитель Алиса Козорезаз ва масабуруз сагърай лугьузва.
Агьмед Магьмудов
