ХМАО-Югрыдин зегьметдин ветеран Жалалдин Абдуразакьова вичин гьакъисагъ зегьметдалди, инсанрив абурун хийир кIандай тегьерда эгечIуналди шегьердин зегьметчи коллективрин ва жегьилрин арада еке гьуьрмет къазанмишнава. Алай вахтунда ам Госдумадин депутат Н.Езерскийдин куьмекчи я.
— Гьикьван хъсан я жуван багъри халкьдин арада садвал хьайила, — къейдзава Ж.Абдуразакьова. — И мукьвара нисинин фу недайла, ина чун лезги стхаяр ва вахар санал кIватI хьана, Яран суварин эхиримжи мярекатар акьалтIарна. Дегь заманайрин халкьдин адетар рикIел хкиз, хъсандиз ял яна. Яргъариз акъатнаватIани, рикI хайи ерийра авай, дидед чIал, чи адетар рикIелай алуд тийизвай чи ватандашрал зун пара шад я. Са ваха “Лезги газетда” Ханты-Мансийскдин лезгийрикай кхьенвай макъалани кIелна. Югрыда яшамиш жезвай лезги стхайри са кьве йис идалай вилик хуьрера авай пенсионерризни инвалидриз чи милли газет кхьена. Лезги халкь патал чалишмишвалзавай Ариф Керимовазни чна баркалла лугьузва. Адавай ийидай ихьтин са тIалабун ава.
Гатуз хуьрериз хъфейла, чаз лезги халкь азиятдик кваз аквазва: чпин чилерал, багълара, салара еке зегьмет чIугвазва, хъсан бегьер къачузва, амма гьасилайди маса гуз жезвач. Яр-емиш Урусатдиз тухун патал улакьар багьа я. Гьавиляй Кьиблепатан Дагъустанда яр-емиш кьабулдай са база ачухнайтIа, хъсан тир. И кардин патахъай Ариф Пашаевичавай Президент П.Путинан Администрациядиз чар кхьин ва месэла гьялун тIалабзава.
Кьвед лагьай теклиф образованидиз, чирвилер авай несил чIехи авуниз талукьди я. Образованидизни илимдиз чна датIана еке фикир гана кIанда. Чун къвезмай несилрин къайгъудани хьун лазим я. ИкI тавуртIа, чун амайбурулай гуьгъуьна амукьда, хъсан кадрияр, алимар, пешекарар жедач.
Гьавиляй Кьиблепатан Дагъустанда “Бажарагълу аялрин школа” ачухин. Муаллимриз Москвадай ва маса шегьеррай командировкайриз теклифиз жеда. Чахъ чи алимар, профессорарни ава. Ахьтин мектебни Гъепцегьа ачухнайтIа, хъсан жедай: ам юкьни юкь я, анилай гьар патахъ датIана гьерекатни ква. Хъел татурай, и гзаф хъсан карда чаз, лезгийриз, белки, гьуьрметлу Сулейман Керимова куьмекин, са хъсанвал ийин. Къуй виликди фирай чи халкь. Къуй виридаз хушбахтлудаказ яшамиш жедай мумкинвилер хьурай!
Чирвилералди, активнивилелди, авунвай, ийизвай краралди, акьул-камалдалди Куьне жув общественный деятель тирди субутнава, Жалалдин стха. Куьн гьи къуллугъдал хьайитIани хкажуниз, Госдумадин депутатвилени хкягъуниз лайихлу я.
Жажалдин Абдуразакьов
