Гатун гуьлуьшан югъ. Къизилдин ранг акьалтнавай никIе “чуьлдин гимиди” — комбайниди гьерекатзава. Инал-анал самарин кIунтIар ала. Къуьлуьн ири кьилери техилдин никIера пакаман кьиляй акъатнавай кьезил шагьвардал лепе гузва. Заз акI я хьи, къуьлуьн никIери чеб битмишарай лежберриз, юкь агъузна, икрамзава… И шикил чаз Сулейман-Стальский райондин кIвенкIвечи карханайрикай сад тир “Зардиян” ООО-да акуна. Райондин хуьруьн майишатдин карханаяр, лежбервилинни фермервилин майишатар гад кIватI хъувунин важиблу кардив эгечIнава.
— Гад гьарай я. Адан са йикъа хъуьтIуьн са варз тухарда, — лугьузва чахъ галаз “Зардиян” карханадиз атай райондин хуьруьн майишатдин управленидин начальникдин заместитель Гьамидин Абдулкъафарова. — Багъларани уьзуьмлухра, саларани производстводин маса хилера агротехникадин серенжемар кьиле тухунихъ галаз сад хьиз, хуьруьн майишатдин карханаяр ва арендаторар гад кIватI хъувунив хъсан гьазурвилер акуналди эгечIнава. Виликамаз туькIуьрнавай план-графикдин бинедаллаз районда гад 25-30 йикъан къене кIватI хъувуна акьалтIарда.
Районда сифтебурукай яз гад агудунив дуьзендин зонада авай “Зардиян” ООО-да эгечIнава. Санлай къачурла, уьзуьмчивилел, багъманчивилел, магьсулдарвилел машгъул тир карханадихъ 82 гектар магьсулрин никIер ава. Чаз акурвал, анра тарифдин бегьер агакьнава. Самун алафни булдаказ ава.
— Алай йисан бегьер патал шазан зулухъай къуьл цайи никIерихъ карханадин зегьметчияр иесивилелди гелкъвена. Нетижада никIера техилдин бул бегьер дигмиш хьана, — лугьузва карханадин кьилин агроном, Дагъустан Республикадин хуьруьн майишатдин лайихлу работник Къурбан Магьмудова. — Алай йисуз чна гьар са гектардай 35 центнердилай тIимил тушиз техил кIватI хъийида. Сифтегьан 20 гектардай лагьайтIа, чна саки 80 тонн вахчунва.
Гад агудунин кIвалахар тежрибалу комбайнер Хейрудин Эмирбегова тамамарзава. Адаз гада Кьасума куьмек гузва.
— НикIерин хъсан гьал, анра агакьнавай тарифдин бегьер акурла, рикIелай гатун йикъан зегьемвал, юргъунвални алатзава, — лугьузва Х.Эмирбегова. — Мадни, халкьдин суфра берекатлу авун патал жуван гададихъ галаз зегьмет чIугунал за шадвалзава.
КIватI хъувур техил хармандал хутахунин карда “ГАЗ-53” маркадин машинрал кIвалахзавай шоферар тир Сефибег Гьажибегова ва Имаммегьамед Бакарова чIугвазвай зегьметни тариф авуниз лайихлу я.
Комбайнидин гуьгъуьналлаз гад агудай никIера пресс-подборщик галай тракторди самар туьквера кьазва.
— Санлай къачурла, алай йисуз районда 2245 гектардай къуьл ва мух кIватI хъийида, — лугьузва Гьамидин Абдулкъафарова. — И кардал 10 комбайн ва пресс-подборщикар галай тракторар машгъул жеда. Дуьзендин зонадин карханайра, майишатра ва арендадин участокра гад агудна акьалтIарай комбайнияр гуьгъуьнлай Герейханован, Кьасумхуьруьн, Агъа СтIалрин, Кьулан СтIалрин, Вини СтIалрин, Курхуьруьн, КIварчагърин ва гуьнепатан зонадин хуьрера гад агудунал желбда. И кар патал кIвалахдин план-график гьазурнава.
…Югъ нисинилай алатайла, чун “Зардиян” ООО-ди гад кIватI хъийизвай никIерай экъечIна. Гуьгьуьлар шад яз, чна тикрарзава: квез къуватар хьурай, халкьдин суфра берекатлу авун патал зегьмет чIугвазвай магьсулдарар!
Хазран Кьасумов
