Эхиримжи йисара маса уьлквейри Россия санкцийрин гьалкъада турдалай кьулухъ телевизоррай, СМИ-рай ва маса чешмейрай чаз аквазвай, кIелзавай хабарар чIалахъ тежедайбур хьанва. Мус эхиримжи хабаррихъ яб акалайтIани, ван къвезвайбур гьа са жуьредин малуматар я: флан региондин губернаторди миллиард чуьнуьхна, 300 миллион манат пул ришвет къачуна, сада килограммралди къизилар, бриллиантар, якъутар кIватIнава, хсуси самолетри цавун бушлухра лув гузва, гимийри гьуьлерал сирнавзава…
Мад эцигзавай дараматрикай, авай кьван кIвалерикайни машинрикай зун рахадач. Гьа и кризисдин вахтунда Россияда, марфадилай кьулухъ экъечIдай къарникъузар хьиз, цIийи-цIийи миллиардерар пайда жезва. Яраб ихьтин четин шартIара абуру къазанжияр гьикI къазанмишзаватIа?
Гьар юкъуз коррупциядихъ галаз женг тухвана кIанда лугьуз гьарайзава. Чахъ авайбур “коррупционерар” я эхир. Вучиз ятIани абур такваз, “коррупциядихъ” къекъвезва.
Бубайрин мисалда лугьузвайвал, “вак акваз, геле къекъвезва”.
Масабур пехил тир Россияда ихьтин девлетар авайбур гила пара хьанва. Телевизоррин экранрилай мукьвал-мукьвал начагъ аялар сагъар хъувун патал пулдин такьатар кIватIзавай серенжемар къалурзава. Миллионарни миллиардар чуьнуьхнавай губернаторринни чиновникрин пулар, абурун кIвалер ва маса мал-девлет куьмек тIалабзавай аялрин сагъламвал мягькемар хъувунин рекье харж авуртIа жедачни? ИкI авуртIа, шумуд аял къутармишиз жеда. Вишералди, агъзурралди! Къуй олигархри, ришветбазри кесиб къатарин инсанар гьикI яшамиш жезватIа кьатIурай. А девлетар абурун пелекай гьекь кIвахьиз кIватIнавайбур туш хьи, а пуларик вири халкьдин пай ква.
Са патахъай, абуруз чизва, гьикьван тарашайтIани, са кьвед-пуд йис шартIуналди дустагъ ийида, я ийидач. Абур чара амачиз къуншидин верч чуьнуьхна лугьуз вад йис кар атIана, дустагъдиз рекье твазвай кесибар туш кьван. Жуван фикирар заз ихьтин шиирдалди акьалтIариз кIанзава:
Чуьнуьхзава, чуьнуьхзава,
ГъвечIидани, чIехидани,
Эркекдани, дишидани.
Гьукуматдин эменни мал
Чуьнуьхзава, чуьнуьхзава!
Чирвилер чи “квез я?” лугьуз,
Бубад къуллугъ хцив вахкуз,
“Гьинай ва гьикI акъудин пад?”
Ийиз фикир йифиз-юкъуз
Чуьнуьхзава, чуьнуьхзава!
Нефсинин чарх вилик гьализ,
Виш манатар саймиш тийиз,
Темягь анжах — миллиардриз,
Мадни девлет артух хъийиз
Чуьнуьхзава, чуьнуьхзава!
Пак Къуръандин къанунрикай,
Чи бубайрин адетрикай,
Ягьни намус, гъейратдикай
КичIе тийиз пачагьрикай
Чуьнуьхзава, чуьнуьхзава!
Гьикьван тараш авуртIани,
Гьакимриз чеб акуртIани,
Тух хъжезмач, иливзава,
Банкарани эцигзава.
Чуьнуьхзава, чуьнуьхзава!
Са стIал гьекь пелел тегъиз,
Кесиб къатар кIурук ийиз,
Чпин тахтар ахъай тийиз,
Халкьариз чеб дугъри къалуз,
“Зун гьаким я” лугьуз-лугьуз,
Чуьнуьхзава, чуьнуьхзава!
Гьажи Къазиев
