Республикадин, уьлкведин дережайра кьиле физвай чирвилеринни тежрибадин, къанажагъдинни алакьунрин конкурсра ва маса серенжемра чи ватанэгьлийри къазанмишзавай агалкьунрикай чав мукьвал-мукьвал хабарар агакьзава.
Докъузпара райондин образованидин управленидин методист, Мискискарин М.Ахундован тIварцIихъ галай юкьван умуми образованидин мектебдин химиядин муаллим Арбен Абдуллаева “ДНК НАУКИ” лишандик кваз тIебии илимрин муаллимар патал кьиле фейи Вирироссиядин II олимпиадада приздин чка къазанмишна. Адаз махсус диплом ва рикIел аламукьдай пишкешар гана. Къейд ийин, и олимпиададин уьлкведин дережадин паюна регионра гъалиб хьайи муаллимри иштиракна.
Олимпиададин финалдин пай алай йисан 19-21-майдиз Москвада кьиле фена. Арада мензил аваз кьиле фейи эвелан паюна 7346 муаллимди иштиракна. Муаллимрин кьатIунринни чирвилерин дережа ахтармишай серенжемдин финалдиз уьлкведин 81 субъектда регионрин паяра гъалиб хьайи 161 кас, гьа жергедай яз Арбен муаллимни, акъатна. ИкI, Дагъустандин патай гегьенш олимпиадада “Хи-мия” предметдай Арбен Абдуллаева пешекарвилин алакьунар къалурна.
Агалкьунар хьайибурув шабагьар вахкунин шад мярекатдал РФ-дин просвещенидин министерстводин академиядин руководитель П.Кузьмина финалдин паюна иштиракайбур лап хъсан пешекарар тирди къейдна.
А.Абдуллаев 1994-йисуз Мискискарин хуьре медениятдин къуллугъчи, шаир Бренбег Абдуллаеван хизанда дидедиз хьана. Мектебда кIелай йисара ада химиядай, алгебрадай, лезги чIалай ва маса предметрай олимпиадайра кIвенкIвечи чкаяр кьуна.
Хуьруьн мектеб куьтягьай 2012-йисуз ам ДГУ-дин химиядин факультетдик экечIна. Вузда кIелай йисара ам республикадин дережадин “Умник-2016” конкурсдин приздин чкадиз лайихлу хьана. Ам факультетрин арада кьиле фейи “Вуч? Гьина? Мус?” къугъунрин, СКФО-дин вузрин жегьилрин инновацийрин конвентдин ва хейлин маса мярекатрин, серенжемрин иштиракчи тир. Вузда ада спортдин хилекни вичин пай кутуна — химиядин факультетдин волейболдин командада къугъвана. Студентрин илимдин кIватIалдин член яз, ада Дагъустандин вузра кIелзавайбурун арада кьиле фейи олимпиадайра са шумудра гъалибвал къазанмишна, приздин чкайриз лайихлу хьана.
2017-йисалай ада Докъузпара райондин образованидин управленида методист яз кIвалахзава, гьа са вахтунда Мискискарин мектебда химиядин тарсарни гузва.
Къейд ийин, 2021-йисуз ада Вирироссиядин “ДНК НАУКИ” олимпиададин региондин паюна 1-чка кьунай, гуьгъуьнлай Москвада уьлкведин дережадин паюна иштиракнай. ЦIи ада республикадин дережада муаллимрин-предметникрин арада кьиле фейи “ПРОФИ-2022” олимпиададани 1-чка кьуна. Чаз Арбен муаллимдихъ мадни еке агалкьунар хьана кIанзава.
К.Ферзалиев
