Чи араба садрани акъвазайди туш. Ериш яваш ятIани, виликди физва.
Яшамиш жедай ксар тахьайтIани, кIвалер пара хьурай! Гьамни са агалкьун я.
КIвалахзавайбурулай кIвалах тийизвайбур пара хьун чи гзаф крар хъендик кумайвилин лишан я. Налогар це — вири кIвалахзавайбуруз элкъведа!
Базар багьа тахьайтIа, уьмуьрдин дад чир жедач. Багьавили яваш жедай вахт гудач. Йигин еришралди — виликди!
Катунал гьалтайла, чав садни агакьдач.
Асайишда я вини кьил, я агъа кьил хъсанбур туш. Сагърай юкьван дережа! Жанавурдиз — хеб, къуьрез — келем. Гьардал — зур хебни зур келем гьалтдачни?..
Къе гишин ятIа, пака тух жеда. Кьилинди умуд текьин я. Умудриз чун вирибурулай винева.
Умудни тахьайла, чун куь хуьда? Рекьер жагъидайди я…
Азарар виринра авайди я. Гьарда жува жув хуьн. Масадал вил эцигай югъ квахьайди я. Чун ахьтинбурукай туш…
“Авач” лугьудалди, “ава” лагь. Авайди хьиз жеда рикIиз…
Инсандиз кьве вил ганватIани, жувахъ галаз санал кIвалахзавайбур са виляй кьун герек я. Са рехъ я вириданди.
Премия низ гуда? Сифте-жуваз, ахпа — амайбуруз. ГъвечIидаз — гъвечIиди, чIехидаз — чIехиди…
Вири суварик фейила, суьруьдив вуж фида? Чубандин сувар суьруь хуьн я…
Ша лагьай чкадиз тефин ахмакьвал я.
Ша талгьана фин — кьегьалвал. Къуьрен мехъерик Аслан пиян хьана низ акуна? Амма къуьрен теклиф Асланди кьунач.
Севре садазни къурху гудач. Вичиз къурху тагайтIа.
ИчIи кьеб кIвале хуьдалди, ацIай кьеч хуьн хъсан тушни? Кьеч — гъеридинди, кьеб — къаридинди.
Бегьер тагур вад къелемдилай бегьер гудай сад хъсан тушни?
Данайрик кутур ламракай яц жеч эхир…
ЦIегь тукIуна рахурайди, яц тукIуна, секинарна…
Садаз чешне муькуьдаз няне хьун мумкин я. Вирибурун кьилерни вилер сад туш…
Хъсанди лугьуз атайди, яманди лугьуз, хъфена.
Гуругь ятIа, басрух тахьана амукьдач. Басрух авай чка чIурух язни амукьдач.
Гьардаз — вичин пен; гьардаз — вичин гъен. Масадахъ муьгьтеж тежен…
Лугьун — зиди, кьабулун — куьди. Кьабул тавуртIани, зи гьахъ — зав, ви гъахъ — вав…
ХъуьтIуьн цикIиз гатун мереяр карагдай адет я. Мерейрин вахт атайла, кьуьдни рикIел хкваш…
Мерд Али
