2018-йисан 28-ноябрдилай 2019-йисан 27-февралдалди Сулейман-Стальский райондин Курхуьруьн М.М.Рагьимован тIварунихъ галай 1-нумрадин мектебди Вирироссиядин образованидин идарайрин арада кьиле фейи «Яратмишунин тегьерда кIвалахзавай Россиядин мектебрин, гимназийрин, лицейрин коллективар» конкурс-килигуна иштиракна. Идакай «Лезги газетдиз» райондин администрациядин пресс-къуллугъди хабар гана.

Къейдзавайвал, конкурсда санлай 21967 касди иштиракна. Иштиракчияр патал «ВикIегьвилелди иштиракзавайбур» ва «Гъалибчияр» номинацияр тайинарнавай.

Конкурсдин нетижада Курхуьруьн М.М.Рагьимован тIварунихъ галай 1-нумрадин мектебдиз гъалибчидин диплом, грамота, шагьадатнама ва гъалибчидин медаль гана. Абурулайни гъейри, мектеб «Алай аямдин интерактивный тарсарин алем» образованидин продукт къачудай ихтияр гузвай сертификатдиз-шагьадатнамадиз лайихлу хьана.

   «Лезги газет»