ММА
И мукьвара Кеферпатан Осетия-Алания республикадин меркезда ММА-дай СКФО-дин чемпионат кьиле фена. Ана Cулейман-Стальский райондин ЦIийи Макьарин юкьван мектебдин 10-классда кIелзавай Эмир Агьмедов (60 кг-дин заланвал авайбурун арада) 1-чкадиз лайихлу хьана.
РикIел хкин: идалай вилик Э.Агьмедова Дагъустандин Кубок патал Мегьарамдхуьруьн районда кьиле фейи акъажунрани 1-чка кьунай. Ада тренерар тир Замир Абдулкамалован ва Алимурад Магьмудован гъилик вердишвилер къачузва. Къуй жегьилдихъ гележегда мадни еке агалкьунар хьурай!
Бокс
Алай вацран эвел кьилера Каспийскда, Али Алиеван тIварунихъ галай спортдин дворецда, боксдай Дагъустандин кIвенкIвечивал патал 17-18 йисара авай жаванрин арада бягьсер кьиле фена. Ана республикадин жуьреба-жуьре районрай ва шегьеррай тир 120-дав агакьна жаванри иштиракна. Абурун арада Сулейман-Стальский райондай тир 3 боксерни авай. Тамам са гьафтеда абурукай заланвилин 10 категориядай виридалайни викIегьбур хкядай мумкинвал хьана. Гъалиб хьайи боксерри СКФО-дин кIвенкIвечивал патал акъажунра иштиракда.
Шадвилелди а кардикай мадни хабар гуз кIанзава хьи, нубатдин — округдин кIвенкIвечивал патал акъажунра чпин гъутарин къуват къалурдайбурун жергеда Сулейман-Стальский райондин КIварчагъай тир Асгьад Агъамегьамедов (81 кг, тренер — Альберт Межидов) ва Агъа СтIалдилай тир Бахтияр Гьажимегьамедовни (91 кг) ава. Санлай къазанмишнавай чкайриз килигна, Дагъустандин Кьиблепатан зона и акъажунра 2-чкадиз лайихлу хьана.
«Лезги газет»
