Алай йисуз школайра кIелун акьалтIарзавай аялри Государстводин нетижаяр кьадай аттестация кьезиларнавай къайдайралди вахкуда. РФ-дин Гьукуматдин Председатель Михаил Мишустина тестикьарнавай ихьтин къарар кьабулунин себеб коронавирусдин тIугъвалдихъ галаз алакъалу я — цIийи азар чукIунин вилик пад кьун, ада гун мумкин тир зиянар тIимиларун.
Кьилди къачуртIа, 2021-йисуз хушуналди хкязавай предметрай имтигьанар 9-классра кIелзавай аялри вахкудач. Асул умуми образованидин гьакъиндай аттестатар абурувай государстводин нетижаяр кьадай аттестация (ГИА-9) чарасуз тир кьве предметдай — урус чIалай ва математикадай вахкуналди къачуз жеда.
11-классар акьалтIарзавай, амма вузрик экечIдай фикир авачир выпускникри Государстводин сад тир имтигьандин (ЕГЭ) чкадал кьве предметдай — урус чIалай ва математикадай Государстводин выпускной имтигьан (ГВЭ) вахкун лазим я. И бинедаллаз абуруз юкьван умуми образование къачунвайвилин гьакъиндай аттестат гуда.
Вузра кIелиз кIанзавай выпускникри анрик экечIун патал лазим предметрай ЕГЭ вахкун чарасуз я. Гьа са вахтунда аттестат къачун патал абуру урус чIалай ЕГЭ-дин нетижаяр агакьарун бес я. ЕГЭ гьакIни вузрик экечIдай фикирдал атанвай алатай йисарин выпускникривайни, чпи 9-классра кIелзавай, амма сад тир имтигьан вахтундилай фад вахкуз кIанзавай жегьил-жаванривайни вахкуз жеда.
Кьилди къачур къайдаяр 11-класс акьалтIарзавай, амма чеб набутар тир аялризни талукь я. Аттестат къачун патал абуру урус чIалай я ГВЭ, я тахьайтIа ЕГЭ (чпи хкягъуналди) вахкана кIанда.
Михаил Мишустина РФ-дин просвещенидин министерстводал, кухтунвай дегишвилер фикирда кьуна, 29-мартдалди цIийи къайдадихъ галаз алакъалу документар гьазурна куьтягьун тапшурмишнава.
Россияда ЕГЭ гьам мектеб акьалтIарунин, гьамни вуздик эке-чIунин имтигьан я. Мектеб акьалтIарнавайдан гьакъиндай шагьидвалзавай аттестат къачун патал ЕГЭ урус чIалай ва математикадай вахкана кIанда.
Идалай вилик Рособрнадзорди, коронавирусдин тIугъвал себеб яз, ЕГЭ-дин имтигьанар вахтунда вахкуз тежезвай выпускникар патал июлдин вацра алава гьафте чара авунвайдакай хабар ганай. Февралдин эвелра Рособрнадзорди Государстводин сад тир имтигьан кьиле тухудай асул вахт малумарнай. ИкI, географиядай, химиядай ва литературадай ЕГЭ — 31-майдиз, урус чIалай 3 ва 4-июндиз кьиле тухуда.
2021-йисуз ЕГЭ вахкунин асул вахт 31-майдилай 2-июлдалди давам жеда, алава вахт — 12-июлдилай 17-июлдалди. Вузрик экечI тийизвай жаванри имтигьанар 24-майдилай 28-майдалди вахкун лазим я. Гьа са вахтунда 11-классра кIелзавай аялар патал тайинарнавай вахт алукьдалди вилик ЕГЭ вахкудай ихтияр 2021-йисуз къуватдай вегьенва.
Алай йисуз ЕГЭ ва выпускной имтигьанар мектебар акьалтIарзавай 795 агъзур аялди вахкудайвал я.
«Лезги газет»
