Хъсанбурун жергеда
Россиядин журналистрин союздин Дагъустанда авай отделение уьлкведин регионра кардик квайбурун арада 2024-йисан нетижайралди виридалайни хъсанбур яз гьисабнавай къадак акатнава.
РикIел хкин, 2023-йисан июлдилай республикадин журналистрин кьилин тешкилатдиз «Лезги газетдин» кьилин редактор Мегьамед Ибрагьимова регьбервал гузва. Йисни зуран девирда отделенидин уьмуьрда хъсан патахъ хейлин дегишвилер кьиле фенва. Кьилди къачуртIа, отделение патал РД-дин информациядин ва печатдин Агентстводи чара авунвай кьве кабинет тамамдиз цIийикIа туькIуьр хъувунва, сайт арадал гъанва, соцсетра аккаунтар кардик кутунва, «Дагъустандин къизилдин цIакул» премия арадал хканва, республикадин районра мергьяматлувилин серенжемар кьиле тухванва ва маса крар тамамарнава. Гегьеншдиз абурукай Россиядин журналистрин союздин Дагъустандин отделенидин сайтдай кIелиз жеда.
Лайихлувилелди къейдна
16-декабрдиз «Лезги газетдин» редакцияда Украинада кьиле физвай махсус серенжемдин иштиракчи, РД-дин искусствойрин лайихлу деятель Алихан Мегьамедрагьимовахъ (ашукь Алиханахъ) галаз гуьруьш кьиле фена.
Къейд ийин хьи, ашукь Алихана СВО-да ам гатIунай са кьадар вахт арадай фейидалай кьулухъ иштиракзава. Ватандин сенгерар хуьз, хайи республикадивай яргъа аватIани, ада Дагъустанда, вичин хайи районда кьиле физвай мярекатрикай кьил къакъудзавач, арада мензил аваз абура иштиракзава.
Ашукь Алихана газетдин редакцияди кьиле тухузвай «Лезги газет — гьар са кIвализ» серенжемдани иштиракзава. Адан сергьятра аваз, чи ватанэгьлиди вичин хайи Мичегьрин хуьре авай вири хизанриз ва мискIиндиз «Лезги газет» кхьиз (санлай 25 экземпляр) цIи пуд лагьай йис я. И кар фикирда кьуна, «Лезги газетдин» редколлегиядин къарардалди ашукь Алиханаз «Лезги газет» — 100 йис» медаль гана. Шабагь адав кьилин редактор Мегьамед Ибрагьимова вахкана. ГьакIни ашукь Алихан и йикъара жегьилриз ватанпересвилин тербия гудай М.Танкаеван тIварцIихъ галай фондунин патайни махсус медалдиз лайихлу хьана.
Чирвилерин акъажунар
14-декабрдиз Ахцегь райондин Гъуьгъвезрин хуьре математикадай мектебра кIелзавай аялрин арада олимпиада кьиле фена.
Акъажунар физикадинни математикадин илимрин кандидат Абдулгьамид Абдулгьамидован экуь къаматдиз бахшнавай.
Санлай къачурла, олимпиадада Кьиблепатан Дагъустандин мектебрай атанвай 57 аялди иштиракна.
Нетижада 1-чка Гъепцегьрин хуьруьн мектебдин ученик Фетали Феталиева кьуна. 2-чкадиз Герейханован хуьруьн мектебда кIелзавай Альбина Яхьяева, 3-чкадиз КIирийрин школа-интернатдин ученица Фатима Азизова лайихлу хьана.
Гъуьгъвезрин мектебдин директор Исамедин Шагьэмирова «Лезги газетдиз» хабар гайивал, гъалибчийриз ноутбук, планшет, смартфон, дипломар, пулдин пишкешар гана.
Савкьатризни пулдин пишкешриз олимпиадада хъсан нетижаяр къалурай мад 10 кас лайихлу хьана.
Чи мухбир
