(Эвел-23-27-нумрайра)
- Ахьтинбур — чпи (чпин) Эхират гана, дуьньядин уьмуьр “маса къачурбур” (хкягъайбур) я ва (гьавиляй) абуруз азаб кьезилардач, я куьмекни гудач.
- Ва гьакъикъатда, Чна Мусадиз Ктаб (Таврат) багъишна, ва Чна адалай кьулухъни (адан) гуьгъуьнаваз расулар ракъурна; ва Исадиз — Марйаман хциз Чна ачух аламатар-керематар багъишна, ва Чна ам “Пак Руьгьдал” (Жабраил малаикдалди) къуватлу авуна. Бес гьар сеферда куь патав куь нефсериз хуш (кIан) тушир кар гваз расул атайла, куьне еке такабурлувалзавани (адаз табий тежез) ва (гьавиляй са) кIапIал куьне (абурукай) таб яз кьуна, маса кIапIал куьне (абурукай) яна рекьизва?!
- Ва абуру (чувуд дин гвайбуру) лагьана (Мугьаммад пайгъамбардиз): “Чи рикIер кIевиз кIевнава (перде ала ва гьавиляй аниз ви гафар гьахьзавач)”. Туш! Аллагьди абур лянет авунва абурун куфрдиз килигна ва (гьавиляй) лап тIимил (абуру) инанмишвалда!
- Ва абуруз Аллагьдин патай Ктаб (Къуръан) атайла, чпив гвайди (Таврат) тестикьарзавай (абуру ам кьабулнач ва Пайгъамбардихъни инанмишвалнач). Идалай вилик (абуру Аллагьдивай) (адалди) куьмек тIалабзавай тир кафирвал авурбурун винел (абуру мушрик-арабриз эхиримжи Пайгъамбар атуналди гьелягьар кьазвай тир. Абуру лугьузвай: эхир замандин Пайгъамбар къведай вахтар мукьвал хьанва ва чна, адаз табий хьана, квел гъалибвал къачуда). Абуруз (чпин ктабрай) чизвай (Мугьаммад пайгъамбар ва Къуръан) атайла, абуру адахъ кафирвална. Ва (гьавиляй Мугьаммад пайгъамбардихъ ва Къуръандихъ иман тагъай) кафирриз Аллагьдин лянет хьуй!
- Лап писди я абуру чеб адахъ маса гайи шей (Аллагьди Къуръан ракъурайла, абуру еке пехилвална, иман къерехдихъ авуна, чпин нефсериз кIанзавайвал, табий яз амукьна Мугьаммад пайгъамбар атайла кардикай хкатнавай чпин куьгьне диндиз. Идалди абуру чпиз куфр хкяна) Аллагьди (авудна) ракъурнавайдахъ (Къуръандихъ) кафирвал авуна, зулум яз (пехилвал яз абурун патай). Аллагьди Вичин чIехи регьимдикай (Вичин зурба нямет -Къуръан) Адан лукIарикай Вичиз кIанидаз (авудна) ракъурзава лугьуз (чувудри еке пехилвална пайгъамбарвал чувудривай арабриз хъхьана лугьуз). Ва абур (Аллагьдин) азабдик акатна (виликдай алай) азабдал алава яз. Ва кафирриз агъузардай азаб жеда!
- Ва абуруз (мусурманри) “Аллагьди (авудна) ракъурнавайдахъ (Къуръандихъ) иман гъваш куьне”, лагьайла, абуру (чувудри) лугьузва: “Чна инанмишвалзава чаз (авудна) ракъурнавайдахъ (Тавратдихъ ва амай чи Ктабрихъ)”. Ва абуру адалай гъейридахъ (адалай кьулухъ атай Къуръандихъ) кафирвалзава, ам (Къуръан) Гьахъ (Гьакъикъат) ятIани, чпив гвайди (Таврат) тестикьарзавай. Лагь (вуна абуруз, эй Пайгъамбар): “Бес вучиз куьне виликдай Аллагьдин пайгъамбарар ягъиз рекьизвай, эгер куьн (квез авудна ракъурнавай Ктабрихъ ва куь пайгъамбаррихъ) инанмишвалнавайбур тиртIа?!”.
- Ва гьакъикъатда, атанай куь патав Муса ачух аламатар — керематар (делилар) гваз, ахпа, куьне адалай гуьгъуьниз (Муса Аллагьди эмирай чкадал фейила), дана гъуц яз кьуна (адаз ибадатиз) — куьн зулумкарар яз.
(КьатI ама)
Таржума авурди – Ямин Мегьамедов,
диндин рекьяй алим
