22-июндиз «Кьурагь район» МР-дин администрацияда райондин кьилин регьбервилик кваз лезги халкьдин къагьриманвилин «Шарвили» эпосдин сувариз гьазурвилер акун патал кьвед лагьай сеферда яз тешкиллувилин комитетдин заседание кьиле фена.

Совещание ачухай Махач Хариева кlватl хьанвайбуруз и сувар цlи 19-сеферда яз кьиле физвайдакай, а суварик иштиракун патал неинки Россиядай, гьакl къецепатан уьлквейрайни мугьманар хквезвайдакай ихтилатна.

«Алатай йисара Кьурагь райондин майданди пуд ва сад лагьай чкаяр кьуна. Гьавиляй цlи чун сад лагьай чка кьаз алахъна кlанда», — лагьана М.Хариева.

Совещанидал Медениятдин, информациядин ва печатдин центрадин начальник А.Будаев, ФС-динни ДМ-дин отделдин начальник Р.Рамазанов, рахана. Абуру тешкиллувилин комитетдин сад лагьай заседанидал къарагъарай месэлаяр гьялнавайдакай, кьилди къачуртlа, улакьар, недай суьрсет, майдан тешкилун патал герек тир затlар ва масабур гьазурнавайдакай лагьана.

Кlвалахдин нетижаяр кьуналди, Махач Хариева вири хуьрерин администрацийрин кьилери 30-июндиз Ахцегьар кьиле фидай республикадин дережадин суварик иштиракун чарасуз тирди лагьана.

«Лезги газет»