Алай йисан 24-февралдиз Докъузпара райондин ЦIийи Къара-Куьре хуьруьн спорткомплексда Кьиблепатан Дагъустандин районрин арада азаддиз кьуршахар кьунай турнир кьиле фена.
Аскер-интернационалист Сократ Гьажиев рикIел хкуниз талукьарай акъажунра Докъузпара, Ахцегь, Кьурагь, Сулейман-Стальский, Рутул, Мегьарамдхуьруьн районрай, Дербент ва Дагъустандин Огни шегьеррай 2002-2005-йисара дидедиз хьайи жегьил спортсменри иштиракна.
«Лезги газетдиз» Кьурагь райондин администрациядин пресс-къуллугъди хабар гузвайвал, Кьурагь хуьруьн ДЮСШ-дин ученикрикай и акъажунра 10 жегьилди иштиракна ва абуру чпин алакьунарни къалурна. ИкI, Урдиханов Урдихана сад лагьай чка (48 килограммдин заланвал), Мегьамедов Вагьида кьвед лагьай чка (35 килограммдин заланвал) ва Тагьиров Алиди пуд лагьай чка (41 килограммдин заланвал) кьуна.
Жегьил пагьливанрихъ гележегдани агалкьунар хьурай!
«Лезги газет»
