22-майдиз Кьурагьрин 2-нумрадин СОШ-да «Сада-сад хуьх» республикадин проектдин сергьятра аваз, рекьеринни улакьрин чlуру агьвалатрин вилик пад атlунин макьсаддихъ элкъуьрнавай мярекат кьиле фена. Идакай «Лезги газетдиз» Кьурагь райондин администрациядин пресс-къуллугъди хабар гузва.

Серенжемдин кьилин тешкилатчияр РД-дин жегьилрин крарин рекьяй министерство я. И жуьредин мярекатар себеб яз аялриз рекьера гьерекатунин къайдайрикай гьихьтин чирвилер аватlа ахтармишзава, абуруз чин тийизвай и ва маса къайдаяр чир жезва.

Мярекатда Россиядин МВД-дин ГИБДД-дин Кьурагь райондин отделдин начальник, полициядин майор Рамалдан Мусаева, и отделдин УУП, полициядин капитан Артик Ярметова, ПДН-дин инспектор, полициядин капитан Алияр Цимиханова, «Кьурагь район» МР-дин ФС-динни ДМ-дин отделдин начальник Рамиз Рамазанова иштиракна.

Абуру аялриз улакьрин гьерекатар авай куьчейра чеб гьикl тухун лазим ятlа ихтилатна. Суьгьбетдин вахтунда аялри гайи жуьреба-жуьре суалриз органрин къуллугъчийри жавабар гана.

Эхирдай мектебдин директор Али Гьажиева метлеблу мярекат тухунай вири мугьманриз чухсагъул лагьана.

«Лезги газет»