“Кьурагь район” МР-дин сайтда хабар ганвайвал, алатай гьафтеда Кьурагьрин хуьруьн стадиондал спортдин милли жуьрейрай Кьиблепатан Дагъустандин жегьилрин арада республикадин дережадин 4-турнир кьиле фена.
Спортдин серенжемдин тешкилатчияр райондин администрациядин физический культурадин, спортдин, жегьилрин крарин рекьяй отдел, мергьяматлувилин “Леки” фонд ва райондин диндин рекьяй крарал машгъул ксар тир. Макьсад — дагъустанвийрин арада спортдин милли жуьреяр машгьур авун. Турнирда Кьурагь, Ахцегь, СтIал Сулейманан, Мегьарамдхуьруьн, Докъузпара районрин ва Махачкъала, Дербент шегьеррай тир 100-далай виниз спортсменри иштиракна. Абуру спортдин 6 жуьредай (путар гваз 30 метрдиз чукурунай, чене акъудунай, 2 км-диз чукурунай, къаткана, штанга хкажунай, чIемерукрай лишанар ягъунай ва цIил ялунай) чпин устадвал къалурна.
Турнир ачухдайла, анал рахай ксари, гьа гьисабдай яз райондин имам Агьмад Бабаева, райондин кьилин заместитель Рамазан Катибова, “Леки” фондунин регьбер Закир Къагьриманова ва масабуру къейд авурвал, ихьтин серенжемри халкьарин арада дуствал мягькемаруниз куьмекзава.
Тамам 4 сятда кьиле фейи къизгъин бягьсерин нетижада гъалибчиярни малум хьана. ИкI, кьурагьвийри — Зейнал Бабаева (30 метрдиз чукурунай), Ибрагьим Мегьамедова (чIемерукрай лишанар кьунай), Ислам Абдулазизова (чене акъудунай), Эдгар Алибегова (къаткана, штанга хкажунай), Жамал Саркарова (Усугъчай) 2 км-диз чукурунай ва Шимихуьруьн командади цIил ялунай гъалибвилер къазанмишна. Командайрин арада Кьурагь райондин команда 1-чкадиз лайихлу хьана.
Турнирда гъалиб хьайи вирибур пишкешар гуналди къейдна.
«Лезги газет»
