И йикъара Кьурагь райондин администрацияда райондин кьилин заместитель М.Хариеван регьбервилик кваз кIвалахдин рекьяй нубатдин совещание кьиле фена. Идакай «Лезги газетдиз» райадминистрациядин пресс-къуллугъди хабар гузва.
Совещанидал райондин отделринни тешкилатрин коллективри тухванвай кIвалахар ва нубатдин гьафтеда вилик акъвазнавай месэлаяр веревирдна. Культурадинни туризмдин центрадин начальник А. Будаева дишегьлийрин сувариз талукь яз тухвай кIвалахрикай ва вилик квай Яран сувариз гьазурвилер акуникай ихтилатна. Ада къейд авурвал, мукьвара культурадин къуллугъчийрин дестеди райондин агьалийриз концерт гуда.
Образованидин отделдин начальник Р.Катибова мектебра пуд лагьай четвертдин нетижаяр кьунин кIвалахдикай ихтилатна. Адан гафарай малум хьайивал, и гьафтеда Кьуьчхуьррин ва Кумухрин мектебра кIелзавай аялрин чирвилер ахтармишунин серенжемар кьиле тухуда. Ада ЕГЭ-диз гьазурвал акунин жигьетдай тухузвай кIвалахдикайни лагьана.
Совещанидал райондин финансрин отделдин начальник Б.Ибрагьимов, хуьруьн майишатдин ва чилерихъ галаз алакъалу отделдин начальникдин везифаяр вахтуналди тамамарзавай А.Фаталиев ва масабурни рахана. Абуру чпин жавабдарвилик квай тешкилатрин кIвалахрикай ихтилатна.
Совещанидин кIвалахдин нетижаяр кьуналди, Махач Хариева вири руководителри «Кьурагь район» МР-дин официальный цIийи сайт патал къведай гьафтедалди чпин идарайриз талукь материалар ракъурунин чарасузвал авайдакай лагьана.
«Лезги газет»
