И мукьвара Кьурагь райондин пресс-къуллугъдин векил Москва шегьердин дзю­додай ЦСК-дин тренер ва 2018-2019-йисарин дзюдодин виридалайни хъсан командадин тренер  Александр  Андреевич  Хаустовахъ  галаз гуьруьшмиш хьана­.

Атанвай делегациядик виридаз машгьур тир тренер, фотограф Борис Владимирович Бухтияров ва 15 спортсмен квай. Абурун арада  еке дережа авай спортсменка, яракьлу къуватрин чемпионка, Вирироссиядин мастеррин турниррин гъалибчи Гуьлназ Замировна Азизовани авай. Алай вахтунда ам августдиз Оренбургда кьиле фидай Европадин Кубок патал акъа­жунриз гьазур жезва.

Спортсменар атунин кьилин макьсад   учебно-тренировочный сборар тухун, Россиядин чемпионатдиз ва Вирироссиядин турнирриз гьазур хьун я.

“Тренер хьун патал зи рехъ яргъиди хьана. Им фагьумна кьабулай къарар я. Гьелбетда, зун гьукуматдин дзюдодин мастеррин яшлу дестедихъ галаз барабар жез алахъдай. Абурун арадай яз, завай советрин девирдин дзюдоист, японвийри “Белый тигр” орден гайи Олег Степанован, садавайни акIажариз тахьай Япониядин Исао Оканодал гъалибвал къачур Борис Мищенкодин ва гьакIни зи хсуси тренер, вичин тербиячийриз уьмуьрдин чешне къалурай Михаил Мухаметшинан тIварар кьаз жеда. Уьмуьрдин рекье гьа касдал гьалтунай за жув гзаф бахтлу кас яз гьисабзава.Зи тренердин уьмуьрдин философия пуд гафуналди къалуриз жеда: гьакъикъат, регьимлувал, сабур”, — лагьана Александр Ха­ус­това, чахъ галаз суьгьбетдайла.

Адахъ галаз суьгьбет авурдалай кьулухъ чун генани шад хьана, вучиз лагьай­тIа, гьа ихьтин машгьур, бажарагъ авай тре-нерди чи ватанэгьли  Гуьлназ Замировна вердишарзава.

Атанвай мугьманри школада спортсменар вилик финин кардин бине кутун па­тал вири шартIар авайди къейдна. И кардиз  тIебиатди, дагълари, ци, инсанрин  ри­кIин михьивили куьмекзава. “Чун са кьадар­ вахтунда Москвадин тIурутIумдик акатна, коронавирусдин гьалкъада гьатна”,- лагьа­на тренердин юлдаш Анастасия Хаустовади.  Ада М.Ю.Лермонтован руьгьдиз бахшна кьиле фейи литературадин мярекатдал школадин аялри кьетIен манадалди шиирар ва “Кавказский пленник” кIе­лайди къейдна.  Спортсменрини яратмишунрин къаст патал тренировкайрин арайра чпизни Лермонтован шиирар чирна.

Чкадин спортсменар-дзюдоистар атанвай спортсменрилай гзаф рази яз амукьна. Ос­ман Абдуллаева мугьманриз вири райондин спортсменрин патай менфятлу тренировкайрай чими келимаяр лагьана: “Хъсан тре­нерри вердишарунал чун гзаф шад я. Хъсан нетижаяр чна инлай кьулухъ къалурда”­.

“Жуван хайи чилел жезвай четинвилериз дурум гуз регьят я. Бубайрин ватанди, аламатдин тIебиатди, дагълари гьевес, вер­дишвилер ва гъалибвилер къачу­дай аш­къи кутазва”, — къейдна Гуьлназ Азизова­.

Райондин агъсакъалринни ветеранрин советдин председателди, райондин физкультурадинни спортдин ва жегьилрин крарин рекьяй отделди мугьманриз райондин акьалтзавай несил спортдал рикI алаз, Ва­тандиз вафалу яз, ватанпересвилин руьгьдаллаз вердишаруник пай кутунай чухсагъул лагьана.

Мугьманрни чпин нубатда школадин директор Надир Тагьироваз ва райондин кьил Замир Азизоваз, чпиз ихьтин хъсан шартIар тешкилунай, тIямлу хуьрекралди таъминарунай сагърай лагьана.

Мугьманар 25-июлдалди районда амукьда. Гуьруьшмиш жез ашкъи авай спортсменривай КIирийрин школа-интернатдиз физ жеда.

Москвадай  атай мугьманрин кIвалах­дин  нетижа чаз инлай кьулухъ аквада.

Алван  Рамазанова