«Ата-бубайрин рехъ» лишандик кваз ФЛНКА-ди (Федеральная Лезгинская национально-культурная автономия) Кьиблепатан Дагъустандин районрин администрацийрин ва СтIал Сулейманан тIварунихъ Лезгийрин музыкадинни драмадин театрдин куьмекни галаз алатай гьафтедин ял ядай йикъара балкIанрал алаз са кьадар ксар виликдай чи ата-бубаяр къекъвей чкайриз рекье гьатунин серенжем кьиле тухвана.
Къейд авун лазим я хьи, вичин макьсад жегьилрин арада хайи ерийрин тарих ва культура машгьурун, Дагъустандин халкьар руьгьдин жигьетдай агудун, республикадин дагълух чкайрин четин месэлайрал фикир желб авун, гьакIни медениятдинни этнографиядин туризм, балкIанрал алаз фидайбурун спорт машгьурун тир и серенжем гила 3-сеферда тешкилнава. ЦIи лагьайтIа, адан сергьятар мадни гегьенш хьанва. Эгер виликан йисара атлуйри анжах Кьурагь ва Агъул районрин мулкарилай чарх янатIа, цIи абурал Ахцегь ва Рутул районарни алава хъхьанвай.
ИкI, 12-августдин нянихъ Кьиблепатан Дагъустандин садвал яржламишун ва, чи ата-бубайрин пак адетриз вафалу яз, дагъвийрин пек-партал алукIнавай атлуйрин са десте санлай чи региондин тарихда лишанлу гел тунвай къадим Ахцегьрин хуьряй экъечIна, Рутул райондин Лакун, Ихрек ва ИчIерин хуьрерай яна, Самурдин дагъларин цIиргъ кьулухъ туна, Кьурагь райондин вичихъ тарихдинни медениятдин кьетIен ва къиметлу ирс авай Гельхенрин хуьруьз агакьна. Рекьин мугьманар ина хуьруьн администрациядин кьил Зураб Камалдинова кьабулна. Абуруз нянин тIуьн гана, вичин, мукьва-кьилийрин ва дустарин кIвалера абуруз ксудай чкаяр чара авуна.
Гуьгъуьнин юкъуз атлуйрин жергейра Кьурагь райондин балкIанраллайбурни гьатна. Кьурагь-чай дере кьуна, абуру Агъул райондин машгьур РичIа хуьруьз рехъ давамарна.
Регина Семедова
