Вичин сад лагьай ктабдиз гьа ихьтин тIвар ганва муаллим Мариян Бугаевади. Газет кIелзавайбуруз Мариян муаллим фадлай таниш я. Милли газетдиз адан макъалаяр, шиирар акъатзава. Махачкъаладин 40-нумрадин юкьван школада лезги чIаланни эдебиятдин тарсар гузвай ва дидед чIалал, литературадал рикI алай и дишегьлидин кьисмет фикир желбдайди я.
Кьурагьрин хуьруьн школада 8-класс куьтягьай руша 1968-йисуз Дербентдин педагогвилин училище акьалтIарна ва хуьруьн школада кIвалахиз башламишна. Хизан кутуна, амма чара жедай чкадал атана. Гьанлай инихъ субайдиз яшамиш жезвай дишегьли хуьряй экъечIуниз, школадихъ галаз алакъа авачир карханайра кIвалахуниз мажбур хьана. 1989-йисалай меркездин школада гъвечIи классрин аялриз тарсар гуз гатIунна, уьмуьр акьалтзавай несилдиз тербия, чирвилер гуниз бахшзава.
1983-йисалай Махачкъала шегьерда яшамиш жезвай кьурагьви дишегьлиди гъвечIи чIавалай яратмишунихъ авай илгьамни квадарнач. Ара-ара гьевесдиз варар ачухна. Нетижада ктабни арадал атана.
КIелдайбур рикIеваз теснифнавай ктабда Ватандикай, Ватандин ЧIехи дяведа душмандихъ галаз женг чIугур къагьриман рухвайрикай, вичел уьмуьрда гьалтай къени инсанрикай, абурун уьмуьрдикай шиирар ва макъалаяр гьатнава.
“Куьн рикIеваз” ктаб ругуд паюникай ибарат я. “Тебрикдин шиирар”, “Уьмуьрдикай шиирар” паяри еке чка кьазва. КIелзавайдаз таъсирдай эсерарни тIимил туш. Абурай са бязи цIарар гъиз кIанзава:
Гада, вуна кьурла зи тIвар,
Секин я зи йифен ахвар.
“Ашукьбур”
Рагъ хкечIна циферикай,
Нур чкIана, зар я дагълар.
Муьгьуьббатдин я куьн бегьер,
Цуьквер язва чилин вилер.
“Цуьквер язва чилин вилер”
ПIузар пIагьиз, сарар кIасиз,
Вал пис касди цIай эцигна.
“Яр вахавай къакъуднава”
Чна чи газетдин амадаг, муаллим, хъсан инсан Мариян вахаз сифте ктаб тебрикзава. Умудлу я хьи, адан илгьамди мадни эсерриз рехъ ачухда.
Абад Азадов
