Мегьарамдхуьруьн райондин кьил Фарид Агьмедова Дагъустан Республикадин Кьилин везифаяр вахтуналди тамамарзавай Владимир Васильевавай райондин агьалияр патал важиблу метлеб авай яшайишдин месэлаяр гьялунин карда куьмек гун тIалабна.
Фарид Агьмедова РД-дин Кьилин везифаяр вахтуналди тамамарзавай В.Васильеваз вичин официальный чарче чеб республикадин ведомствойрин къаришмишвал авачиз гьялиз хьун мумкин тушир яшайишдин важиблу месэлайрин сиягь раижна.
Чарчиз килигуналди, РД- Кьилин везифаяр вахтуналди тамамарзавай Вадимир Васильева тапшурмишна:
- РД-дин Гьукуматдин Председателдин заместителдин везифаяр вахтуналди тамамарзавай Билал Омаровал ва РД-дин хуьруьн майишатдин ва суьрсетдин министрдин везифаяр вахтуналди тамамарзавай Керимхан Абасовал Мегьарамдхуьруьн райондин хуьрер дигидай целди таъминарунин рекьяй серенжемар кьабулун тешкилун.
- РД-дин Гьукуматдин Председателдин заместителдин — РД-дин экономикадин ва территорияр вилик тухунин министрдин везифаяр вахтуналди тамамарзавай Раюдин Юсуфовал ва РД-дин образованидинни илимдин министрдин везифаяр вахтуналди тамамарзавай Шагьабас Шагьовал КьепIир-Къазмайрин хуьре аялрин бахчадин дарамат эцигунин месэладиз килигун.
- РД-дин Гьукуматдин Председателдин заместителдин — РД-дин экономикадин ва территорияр вилик тухунин министрдин везифаяр вахтуналди тамамарзавай Раюдин Юсуфовал ва РД-дин здравоохраненидин министрдин везифаяр вахтуналди тамамарзавай Танка Ибрагьимовал Мегьарамдхуьруьн райондин Мегьарамдхуьре поликлиника эцигунин месэладиз килигун.
Вири и ва са жерге маса месэлайрай райондин кьил Фарид Агьмедова виликан йисара федеральный ва республикадин жуьреба-жуьре ведомствойривай куьмек гун са шумудра тIалабайди я. ГьикI хьи, и месэлаяр гьялунихъ райондин агьалияр патал кьетIен метлеб ава.
Муьгъверганрин хуьре, Самур вацIун къерехда, яд къачудай кьилин имарат эцигунихъ галаз алакъалу сад лагьай месэладай ихьтин гьалар арадал атанва: сел атайла, вацIу вичин хура гьатай бегьерлу чил тухузва. Идани Мегьарамдхуьруьн райондин 9 хуьруьн ва мадни маса районрин кьве хуьруьн майишатдиз зурба зиянар гузва. РикIел хкин: 2002-йисуз вацIун къерехда гидроимарат эцигунин кIвалахар гъиле кьунай. Амма къени кардал кIукI гъиз хьанвач. Нетижада 20 агъзурдалай виниз агьалияр яшамиш жезвай 11 хуьр дигидай яд авачиз амукьзава.
Мегьарамдхуьруьн районда поликлиника эцигуникай рахайтIа, райондин кьил Фарид Агьмедова региональный властривай ва федеральный ведомствойривай и месэла гьялунин карда эхиримжи йисара са шумудра куьмек гун тIалабайди я. Арадал атанвай шартIара агьалийриз медицинадин рекьяй ерилу куьмекар гудай мумкинвал авач. Гьа са вахтунда Мегьарамдхуьруьн район сергьятдин патав гвай район тирди, ина пограничникрин хизанарни яшамиш жезвайди, медицинадин рекьяй абурузни и районда къуллугъзавайди фикирда кьун герек я.
КьепIир-Къазмайрин хуьре аялрин бахча эцигунин месэлани важиблуди я. И чIехи хуьре виликдай гьич садрани аялрин бахча хьайиди туш. Идалай гъейри, пограничникрин аялриз школадилай виликан чирвилер ва тербия гунин кIвалах кьиле тухун лазим тирдини фикирда кьун герек я.
Мегьарамдхуьруьн райондин
администрациядин пресс-къуллугъ
