Гьукуматди ватандашриз, хизанриз гузвай куьмекрик яшайишдин икьрар­ни акатзава. Ам чпин къазанжи яшамиш хьун патал чарасуз тир агъа кIанин кьадардилай тIимил гьалтзавай хизанривай­ къачуз жеда. Яшайишдин икьрар ку­тIун­дайла, эхиримжи 12 вацра атанвай къазанжи фикирда кьазва.

Важиблу шартIар ихьтинбур я:

 хизанда авай гьар са касдал гьалтзавай къазанжидин къадар Дагъус­танда тайинарнавай яшамиш хьунин агъа кIа­нин кьадардилай тIимил хьун герек я;

 РФ-дин ватандаш хьун герек я;

 игьтияж ава лагьана тестикьарзавай тайин себебарни фикирда кьазва: кIвалах амачиз амукьун, азарлу хьун, уьмуьр­дин юлдашдихъ галаз чара хьун.

Яшайишдин икьрардин бинедаллаз къачур такьатар ихьтин макьсадра ишлемишиз жезва:

 са сеферда гузвай пулунин такьатар – 350 агъзур манат кьван жуван хсуси кардик кьил кутуниз, кьилди къачуртIа, хизандин бизнес башламишун патал устIархана, туьквен патал тадаракар къачуниз, хкянавай чка ремонт авуниз ва метягьар маса къачуниз;

 хуьруьн майишат патал: калер, хипер, верчер, теплицаяр, тумар ва гьайванрин ем къачуниз;

 яшамиш жезвай кIвал цIийи хъувун патал (чкIизвай гьалда авайла): къав, цлар, сантехника, электричестводихъ галаз алакъалу къурулуш къайдада хтуниз талукь материалар маса къачуниз.

Агьвал тIимил авай хизанривай, яша­йишдин икьрардин сергьятра аваз, са жерге макьсадар патал пулунин куьмек къа­чуз жеда: сифте нубатда герек тир суьрсетриз, парталризни кIвачин къа­па­риз­, дар­манризни сагъарунин серенжемриз, классдилай къеце тир мектебдин мярекатриз; мектебда герек тир затIариз ва ЖКХ-дин къуллугърин гьакъи гуниз.

«Лезги газет»