СтIал Сулейманан райондин кьил Саид Темирхановаз, жемиятдин хатасузвал хуьнин рекьяй райадминистрациядин кьилин заместитель Абуталиб Фатулаеваз, военный комиссар Райзудин Женетоваз ва жавабдар маса ксариз дяведин махсус серенжемдин иштиракчийрихъ галаз гуьруьшмиш хьун адет хьанва. Абуру и йикъара вичин ватанпересвилин буржи кьилиз акъудзавай Мегьамедбег Тегьмезов ва адан буба Мегьамедвели кьабулна. Агъа СтIал-Къазмайрилай тир, 24 йисан яшда авай М.Тегьмезов Д-30 яракьдин лишанчи (наводчик) я.
Абуталиб Фатулаева викIегь хва Мегьамедбегаз ватанпересвиляй чухсагъул малумарна, районда СВО-дин иштиракчийрин ва абурун хизанрин гьакъиндай ийизвай къайгъударвиликай, куьмек гун яз кьабулзавай серенжемрикай лагьана, кьегьал хва тербияламишунай буба Мегьамедвели Тегьмезоваз чухсагъул малумарна.
Отпускдиз хтанвай контрактник М.Тегьмезова гуьруьшдал вичиз кIвал эцигдай чилин участокдин патахъай игьтияж авайдакай лагьана.
Районда СВО-дин гьар са иштиракчидиз яшайишдин паспортар туькIуьрнава, ана гьар са касдин игьтияжар къалурнава, абур кьилиз акъудун патал серенжемар кьабулзава. И кар Сергей Меликован, райондин кьил Саид Темирханован кьетIен гуьзчивилик ква.
— СВО-дин иштиракчияр, гъалибвал къачуна, сагъ-саламатдиз чпин хизанрин патав хтун чи мурад я, — лагьана гуьруьшдин эхирдай Абуталиб Фатулаева.
М.Тегьмезова лагьайвал, отпуск куьтягь хьайила ам махсус серенжем кьиле тухузвай зонадиз хъфида.
«Лезги газет»
