Дагъустан Республикадин Кьил Владимир Васильева РД-дин Гьукуматдин Председателдин Сад лагьай заместитель Анатолий Къарибован ва Россиядин Федерациядин Президентдин патав гвай Дагъустан Республикадин Гьамишалугъ векил Жамалдин Гьасанован иштираквал аваз гуьруьш кьиле тухвана. Гуьруьш кьиле фидай чIавуз республикада “Виш школа” программа кьилиз акъудунин нетижаяр кьуна, гьакIни къведай йисуз вилик акъвазнавай везифаяр веревирдна.
Месэладин нетижайриз килигдай чIавуз Жамалдин Гьасанова региондин Кьилиз лагьайвал, 2020-йисузни и карда иштиракиз чеб гьазур тирдан патахъай виш спонсорди малумарнава.
РикIел хкин, чирвилер гудай идараяр чпивай ийизвай истемишунриз жаваб гудай гьалдиз гъунихъ элкъуьрнавай “Виш школа” проект кардик кутунин теклиф Дагъустандин Кьил Владимир Васильева 2018-йисуз гана. Проектдин кьетIенвал квекай ибарат я лагьайтIа, республикадин бюджетдай тайин кьадар пул чара ийизва, гуьгъуьнлай муниципальный тешкилатдин администрация, депутатар, меценатар, къайгъудар ксар месэла гьялунал машгъул жезва. ИкI хьайила, пулдин такьатар харжзавай тегьер гуьзчивилик кутунин чарасузвал амукьзавач, идалайни гъейри, алава кIвалахар кьиле тухудай мумкинвални жезва.
2018-йисуз проект кьилиз акъуддай чIавуз 100 школадин чкадал 117 школада ремонтдин кIвалахар кьиле тухуз алакьна.
2019-йисуз “Виш школа” проект кьилиз акъудунин карда куьмек гуз кIанзавайбурун кьадар артух хьунихъ галаз алакъалу яз чирвилер гудай 227 идара ремонтда.
Санлай къачурла, кьве йисан муддатда, виликдай пландик кутунвайвал, 250 ваъ, 334 школа ремонтда. Владимир Васильеван гафаралди, им тухузвай кIвалахдик къуьн кутур къени, масадан дердиникай хабар кьадай ксарин чалишмишвилерин нетижада мумкин хьайи кар я.
Региондин руководителдин гафаралди, “100 школа” проект гуьгъуьнин йисарани кьилиз акъудда, гьикI хьи, ремонт авуна кIанзавай, девирдин истемишунрихъ галаз кьадай гьалдиз гъун лазим тир кIелдай хейлин идараяр ама. Гележегда ремонтна кIанзавай вири мектебар дуьзгуьн къайдадиз гъида.
«Лезги газет»
