РФ-дин Президент В. Путина къейд авурвал, мукьвал вахтара Дагъустанда гьалар хъсан хъжеда. “Дагъустанда коронавирусдихъ галаз алакъалу яз арадал атанвай четинвилер кьулухъ алудун патал РФ-дин гьукумди чарасуз тир вири серенжемар кьабулда”, — лагьана РФ-дин Президент В.Путина аялрин ихтияррин рекьяй уполномоченный Анна Кузнецовадихъ ва “Диде-бубавилин баркалла” ордендалди къейд авур хизанрихъ галаз видеоконференция кьиле тухвай вахтунда.
Президентди Дагъустандай тир Къурбановрин хизандивай абурун хуьре коронавирусдин тIугъвалдихъ галаз алакъалу гьалар гьикI аватIа хабар кьуна. Жаваб яз, Сапият Къурбановади уьлкведин регьбердиз республикада гьалар хъсанзавачирди, амма чпин хизандин векилар сагъ-саламат тирди, пешекарри куьмекар гузвайди, дарманралди таъмин ва вири хъсан тирди лагьана.
“Зун инанмиш я, вири хъсан жеда, вири Дагъустандани гьалар хъсан хъжеда, вири гуьнгуьна гьат хъийида. Республикадин Кьилихъ галаз ачухдаказ ихтилат кьиле тухвай чIавузни за лагьайвал, гьелелиг четин месэлаяр амай маса субъектра хьиз, Дагъустандани гьалар пайгардик ахкатун патал чна вири серенжемар кьабулда”, — малумарна Президентди.
В.Путина Къурбановрин хизандиз ва республикадин агьалийриз сагъвал, хушбахтвал алхишна.
Къейд ийин, Къарабудахкент райондин Первомайский хуьряй тир Къурбановрин хизан В.Путинан къарардалди “Диде-бубавилин баркалла” ордендалди къейдна.
«Лезги газет»
