Дагъустандин здравоохраненидин министрди Каспийскдин ЦГБ-дин кьилин духтурдин везифаяр тамамарзавайди яз вичин ери-бине Хасавюрт райондин Къурушрин хуьряй тир Расим Рамазанов тайинарнава.
Алатай гьафтеда республикадин здравоохраненидин министр Жамалудин Гьажиибрагьимов Каспийск шегьердин центральный больницада хьана. Адаз медицинадин и идарадин кIвалахда хейлин кимивилер авайди акуна. Кьилди къачуртIа, больницадин дарамат лап татугай гьалда ава. Ам капитальнидаказ ремонт авунин чарасузвал арадал атанва. Аялар хадай стационарда ва “тади куьмекдин” станциядани гьалар тарифдай чкадал алач. Сагъар хъийидай идарадин гьаятни, бегьем гелкъвен тийиз, гъиляй вегьенва.
Министр больницадин гьаятда эцигзавай 120 койкадин лечебно-терапевтический корпусдизни килигна. Шегьердин администрацияди и дарамат эцигунин кIвалахар гьеле 2009-йисуз гъиле кьурди тир. Жуьреба-жуьре себебар аваз, кIвалахар лап энгел хьана.
ЦГБ-дин поликлиникада “Моношегьерар комплекснидаказ вилик тухун” программадин сергьятра аваз алай вахтунда ремонт авунин кIвалахар кьиле тухузва. Килигай чIавуз министрдиз инани хейлин кимивилериз рехъ гузвайди акуна. Кьилди къачуртIа, багьа тадаракар ишлемишунин къайдайрал амалзавач. Кондиционерри дараматда чимивал лазим тир дережада аваз хуьн таъминарун герек я. Ина компьютерный томографни эцигнавайди я. Амма лазим тир чимивал хуьнин къайдайрал амалзавач, техника дуьздаказ ишлемишзавач.
Килигна куьтягьайдалай гуьгъуьниз Жамалудин Гьажиибрагьимова больницадин руководстводиз эвер гана ва кIвалахдив икI рикI гвачиз эгечIуниз рехъ гана виже къвен тийидайди къейдна.
Гуьгъуьнлай, 4-июндиз, Дагъустандин здравоохраненидин министрди Каспийск шегьердин центральный больницадин кьилин духтурдин везифаяр тамамарзавайди яз Расим Рамазанов тайинарна. Идалай вилик Р.Рамазанов Республикадин клинический больницада сочетанный патологиядин отделенидин — медицинадин рекьяй энгелиз тежер махсус куьмек гудай Центрадин кьиле авайди тир. Больницадин цIийи руководителдиз ам кIвалахда ахтармишунин вахт ганва. Ругуд вацран муддатда ада медицинадин идарадин кIвалахда къайда тун герек я.
РД-дин здравоохраненидин министр Жамалудин Гьажиибрагьимов шегьердин аялрин 1-нумрадин больницадани хьана. Инани адаз са жерге кимивилериз рехъ гузвайди акуна.
«Лезги газет»
