Карчивал вилик тухунин барадай лайихлувилерай ва гзаф йисара гьакъисагъвилелди зегьмет чIугунай Дагъустан Республикадин Кьилин 2018-йисан 29-майдин 62-нумрадин Указдалди Махачкъала шегьердин сергьятламишнавай жавабдарвал хиве авай “Димитров Кабель” обществодин тешкилатчи Шагьпаз Асахановаз Дагъустан Республикадин Гьуьрметдин грамота ганва. Мубаракрай!
Дагъустандин “Димитров Кабель” ООО карханадин руководитель, вичин ери-бине Сулейман-Стальский райондин Эминхуьряй тир чи газетдин хъсан амадаг Ш.Асаханов “Промышленностдин производстводин хиле лап хъсан кархана” номинациядай “Россиядин лап хъсан 100 кархана ва организация — 2017” лишандик кваз кьиле тухвай Вирироссиядин конкурсдин гъалибчи я.
Шагьпаз Асаханова мергьяматлувилин кIвалахни тухузва. ИкI, Шагьпаз Муслимовича гьар йисуз хайи хуьруьн тIимил таъмин хизанриз пулдин куьмекар гузва, жегьилар, кIелзавай аяларни рикIелай ракъурзавач. Ада Етим Эминан уьмуьрдиз ва яратмишунриз талукьарнавай “Эминан эсерар кIелун” конкурс, спортдин серенжемар кьиле тухун патал пулдин такьатар чара ийизва, акъажунра гъалиб хьайибур призар ва къиметлу савкьатар гуналди ашкъиламишзава. Ам Вирироссиядин “Йисан руководитель 2016” гьуьрметдин премиядин лауреатни я.
«Лезги газет»
