Алатай жуьмядиз къадим Дербентда, ДГУ-дин филиалдин конференц-залда, “Дин ва алай аям” лишандик кваз тешкилай мярекатдин сергьятра аваз Дагъустандин милли политикадин ва диндин крарин рекьяй министерстводи “Дин ва экономика” хиляй илимдинни тежрибадин конференция кьиле тухвана. Адан кIвалахда ДГУ-дин Дербентда авай филиалдин директор Исмаил Абдулкеримова, адан заместитель Рамис Гьашимова, Дербент шегьердин администрациядин экономикадин ва инвестицийрин управленидин регьбер Садулла Кудаева, студентри, жемиятдин, диндин тешкилатрин, СМИ-дин такьатрин векилри иштиракна.
Алай аямда жемиятда динди кьазвай чкадикай рахадайла, РД-дин милли политикадин ва диндин крарин рекьяй министр Энрик Муслимова кIватI хьанвайбур министерстводи кьиле тухвай социологиядин ахтармишунрин нетижайрихъ галаз танишарна. ИкI, хабарар кьур ксарикай 78 процентди “Дагъустанвияр светский государствода яшамиш хьун, амма динди жемиятда кьиле физвай гзаф крариз асул метлебдай таъсир авун лазим я”, — лугьузвайди къейдна.
Гуьгъуьнлай мярекатдин сергьятра аваз са шумуд касди, гьа гьисабдай РД-дин муфтиятдин Кьиблепатан территориальный округда авай векил Гьуьсейн Гьажиева, ДГУ-дин ЮНЕСКО-дин кафедрадин доцент, филологиядин илимрин кандидат Гуьльчохра Сеидовади, ДГУ-дин доцент, экономикадин илимрин кандидат Оксана Мегьамедовади ва масабуру докладар кIелна, диндиз ва динэгьлийриз талукь жуьреба-жуьре месэлаяр веревирдна, мугьманри студентрин суалриз жавабар гана.
Шадвилелди мадни а кардикай хабар гуз кIанзава хьи, мярекатдин эвел кьиляй Энрик Муслимова Дербентдин государстводинди тир тарихдинни архитектурадин ва художественный музей-заповедникдин Дагъустандин гамарин ва декоративно-прикладной искусстводин музейдин заведующийвиле кIвалахзавай чи ватандаш, вичин ери-бине Сулейман-Стальский райондин Агъа СтIалдилай тир Таиса Алибутаевадив РД-дин милли политикадин ва диндин крарин рекьяй министерстводин “Миллетрин арада ислягьвал ва разивал мягькемарунай” Гьуьрметдин знак (лишан) вахкана. Энрик Селимовича Т.Алибутаева къадим Дербентда кьиле тухузвай медениятдиз ва диндиз талукь саки вири мярекатрин активный иштиракчи тирди, этнотуризм вилик тухуник ада лайихлу пай кутазвайди къейдна.
РикIел хкин: Т.Алибутаевади винидихъ тIвар кьунвай музейдин заведующийвилин везифаяр тамамардалди вилик 5 йисуз Дербентдин дуьньядин культурайрин ва динрин тарихдин музейда белед-экскурсовод яз зегьмет чIугунай. Къадим шегьердин килигуниз лайих авай гьар са пIипI туристриз къалурун патал ада еке кIвалах кьилиз акъуднай, гьа гьисабдай яз, цIийи маршрутарни туькIуьрнай.
— Алатай йисара авур кIвалахдиз къимет гун, гьелбетда, шад жедай кар я. Ихьтин кам къачуни белед-экскурсоводдин кIвалахдин кесерлувал хкажзава. Идахъ галаз сад хьиз, и кардал машгъул жедай жегьиларни майдандиз гзаф акъатдайдак умуд кутаз кIанзава. Дугъриданни, белед-экскурсоводдин пешеда виридалайни кьилинди адав рикI гваз эгечIун, датIана жуван винел кIвалахун, чирвилер къачун я, — къейдзава Т.Алибутаевади. — И рекье мягькем камар къачуз заз куьмекар гайибур зи муаллимар я: сифте нубатда, Агъа СтIалрин юкьван школада тарсар гайибур. Гуьгъуьнлайни и кар давамарай ДГУ-дин Дербент шегьерда авай филиалдин муаллимар, гьакIни Дербентдин дуьньядин культурайрин ва динрин тарихдин музейдин директор Диана Гьасанова (музейрин кIвалах чирунин рекье ам зи сад лагьай муаллим я), чи куратор тир Жамиля Дагирова ва масабур. За абуруз виридаз сагърай лугьузва!
Чи мурадни хайи ерийрин, къадим шегьердин, республикадин тIвар машгьурзавай ватандашдихъ мадни еке агалкьунар, дуьньядани ислягьвал хьун я.
Рагнеда Рамалданова
