3-ноябрдиз Дербент райондин администрациядин дараматдин вилик квай майдандал  Халкьарин садвилин йикъан сувариз, райондин 98 йис тамам хьуниз,  “Къизилдин зул” ва республикадин Vlll  “Севиндж” фестивалриз талукь мярекатар кьиле фена.

Ана Дербент райондин кьилин везифаяр тамамарзавай Фуад Шихиева,  Да­гъустан Республикадин Халкьдин Соб­ранидин депутатар Яхья Гьажиева, Ферзилагь Исламова, Эрик Иб­рагьи­мова, Дербент шегьердин кьилин заместитель Заур Эминова, Дагъустандин Огни шегьердин кьил Зейдулла Гьа­шимова, ва ма­сабуру иштиракна.

Экуьнин сятдин кlуьдалай майдандал халкь кlватl жезвай.

Райондин хуьруьн майишатдин зегьметчийри гьасилнавай гьар жуьре майваяр ва еми­шар са шумуд павильонда эцигнавай. Райондин хуьрерин ва поселокрин майданрал суфраяр няметрив ацlанвай ва абур мугьманриз  теклифзавай.

Ашпазри кьуд къажгъанда гьазурнавай ашдикай вирида дад акуна.  Аш гьазурун патал­ абуру 50 кг дуьгуь, 24 верч, 10 кг кьурай емишар ва  маса шейэр серфна.

Мярекат кьиле тухузвай райондин культурадин, милли политикадин ва диндин рекьяй  отделдин начальник Секина Сеидовади суварар ачухун патал гаф Фуад Шихиеваз гана.

Ада хуьруьн майишатдин работникризни ветеранриз, мярекатдал кlватl хьанвайбуруз кьуд суварни тебрикна,  чуьллера кlвала­хар акьалтlарайла районда сувар тухун хъсан адетдиз элкъвенвайди къейдна.

— Халкьарин садвилин югъ, — давамарна ада, —  им неинки чIехи несилрин игитвилиз гьуьрмет ийизвай югъ я.  И сува­ри чун сад тирла къудратлу тирдан патахъай­  сада-садаз лугьудай мумкинвал гуз­ва. Чи къуватдин ва садви­лин бинеяр чи хуьрера, чун яша­миш жезвай ва чна зегьмет чlуг­ваз­вай чкай­ра кутазва… Заз квехъ мягькем сагъ­ламвал, ис­лягь­вал ва хушбахтвал хьун, куьне рай­ондин, республикадин ва Россиядин абадвал патал мадни зарбачивилелди зегьмет чIугуна кlанзава.

Кlватl хьанвайбуруз суварар Яхья Гьажие­ва, Ферзилагь Исламова ва масабуруни тебрикна.

Фуад Шихиева хуьруьн майишат вилик ту­ху­ник чlехи пай кутазвай са шумуд пешекардив грамотаяр вахкана.

Мярекатдин концертдин программани итижлуди хьана. Ана азербайжанрин театрдин артистри, музыкадин училищедин студентри, кьуьлердай “Каспий” ансамблди ва райондин аялрин яратмишунрин кlвалерин жаван артистри иштиракна.

Къагьриман Ибрагьимов