Кьадар дегиш хьанва
2022-йисуз уьлкведа яшайишдин 100 агъзур икьрар кутIундайвал я
Дагъустандин экономикадин ва мулкар вилик тухунин министерстводин Телеграм-каналди хабар гузвайвал, яшайишдин икьрардин (социальный контракт) сергьятра аваз чара ийизвай пулдин такьатрин кьадар артухарнава. Гила яшайишдин икьрардин куьмекдалди хсуси карчивал ахъаюн патал — 350, къазанжияр къачудай макьсад аваз ЛПХ (личное подсобное хозяйство) вилик тухуниз 200 агъзур манатдал къведалди пул къачудай мумкинвал ава.
РикIел хкин, яшайишдин икьрар кутIундай ихтиярар тIимил таъмин тир хизанриз ава. Адан бинедаллаз агьалияр яшайишдин рекьяй хуьдай къуллугъдин органри уьмуьрдин четин уламрай экъечIиз ва дурумлу къазанжи къачуз куьмекзава.
Яшайишдин икьрар яшамиш жезвай чкада авай агьалийривай яшайишдин рекьяй къуллугъдин центрада кутIуниз жеда.
Агьалийрин фикирдиз!
Арзаяр гьазурдайла, гьар са агьалиди чпин делилар, алакъадин нумра гъалатIар квачиз кхьин важиблу я
“Лезги газетдиз” РД-дин Пенсийрин фондунин пресс-къуллугъди хабар гайивал, 8-17 йисарин яшара авай аялриз гузвай пособие къачунин карда жуьреба-жуьре себебралди отказ авунвай агьалийри фондуниз са къатда арзаяр рекье твазва. И кар себеб яз, арзаяр кьабулзавай электронный къурулушдин кIвалах зайиф, гъалатIар пайда жезва. Къурулушда гзаф кьадар документар хьайила, абур ахтармишизни гзаф вахт герек къвезва.
И делилар фикирда кьуна, РД-дин Пенсийрин фондунин векилри винидихъ къейд авур пособие къачунин карда отказ авунвай агьалийривай арзаяр нубатдин сеферда электронный почтадин Pfrdoog@mail.ru адресдиз ракъурун тIалабзава. И дуьшуьшда арзаяр энгел тавуна ахтармишда ва гьихьтин себебралди отказ авунватIа, хабар гуда.
Арзаяр гьазурдайла, гьар са агьалиди чпин делилар, алакъадин нумра гъалатIар квачиз кхьин ва чпихъ авай месэладин метлеб куьрелди ачухарун лазим я.
Гьазурайди — Агьмед Магьмудов
