Аял маса гана

Каспийск шегьердин уголовный розыскдин къуллугъчийри пулдихъ вичин хва масабуруз маса гайи 33 йис хьанвай дишегьли кьуна.

Чешмеди хабар гузвайвал, кIвачел залан дишегьлидиз аял духтурханада таз кIанзавай. Амма адан къуншидал яшамиш жезвай 29 йис хьанвай дишегьли­ди адаз аял Сергокъала райондай тир вичин чирхчиррин хизандиз вахкун теклифна. Нетижада аял кьабулунин вири шартIар веревирд авурдалай кьулухъ гележегдин диде-бубади кIвачел залан дишегьлидиз хсуси игьтияжриз харж авун патал 20 агъзур манат пул гана.

Аял хайидалай кьулухъ, икьрар хьайивал, ам диде­дивай Сергокъала райондин агьалийри вахчуна. Гуь­гъуьн­лай аял начагъ хьайила духтурханадиз тухун па­тал документар герек хьана. Абуру и кардикай хайи диде­диз хабар гана, амма ада документрин месэла туькIуь­рунин эвезда вичиз 100 агъзур манат пул гун истемишна.­

Пул адав агакьна, амма документар туькIуьрдай вахт адахъ амукьнач: и дуьшуьшдин вири иштиракчияр­ РД-дин МВД-дин полицескийри кьуна.

Уголовный дело къарагъарнава.

ТупIун гелерин куьмекдалди

Тахсиркарвал авунвай чкадал тазвай гелерин куьмекдалди экспертривай тахсиркардин ДНК тайинариз жез­вайди гзафбуруз чизва. И делил фикирда кьуна, агъа­­дихъ ихтилат фидай дуьшуьшдин кьилин игит гзаф му­къа­­ят­ хьана. Амма са кар ада рикIелай ракъурна: рушан гардандал эцигай чукIулдин тумунал адан тупIа­рин гелер аламукьна.

Махачкъала шегьердин Кирован райондин полициядиз 23 йис хьанвай рушал писликвилер гъанвайдан гьакъиндай хабар агакьна. Тапарар авуналди кIва­лиз гьахьай итимди рушаз чукIулдалди кичIерар гана, адал писликвал гъана. Тахсиркарвал йифен вахтунда авунвай ва шагьидарни авачир.

РД-дин МВД-дин экспертри-криминалистри тахсиркарвал авунвай чкадилай жагъанвай вири затIар хъсандиз ахтармишна ва нетижада чукIулдин тумунилай ту­пIун гелер жагъана.

Гуьгъуьнлай тахсиркар Шамил райондай тир 41 йис хьанвай итим тирди тайинарна. Полицейскийри кIватI­навай материал уголовный делодай кIвалах давамарун патал РФ-дин СК-дин РД-да авай Силисдин управленидиз вахканва.

Канабдин кулар жагъана

РД-дин къанун-къайда хуьдай органрин векилри вичин хсуси кIвале канаб цанвай Избербаш шегьердин 51 йис хьанвай агьали кьуна. Адан теплицадай хъсандиз гелкъуьн тешкилнавай канабдин 57 кул жа­гъана.

Чешмеди малумарайвал, канабдин куларилай гъейри, винел патан акунрай анашадиз (марихуана) ухшар затI авай пакетни жагъана. Гуьгъуьнлай ахтар­мишунар кьиле тухвайдалай кьулухъ пакетда авайди­ анаша  тирди (3 690 грамм) тестикь хьана.­

РФ-дин УК-дин 2 статьядал бинеламиш хьана уголовный дело къарагъарнава.

Келемрин савда

Акъуша райондин дежурный частуниз 63 йис хьанвай чкадин агьалидилай арза атана. Арзадин иесидин гафаралди, Леваша райондин 56 йис хьанвай агьа­лиди, тапарар авуна, адавай 683 агъзур манатдин къиметда авай хуьруьн майишатдин суьрсет къакъудна.

Полицейскийри шак физвайди кьуна. Якъин хьайивал, ада чкадин фермердиз 70 тонндив агакьна келемар­ ­маса гун теклифна. Майишатдин сагьиб адан теклифдал рази хьана ва метягь маса гун патал Леваша район­дин агьалидив вугана.

Амма фермердиз гайи гаф ада хвенач. Ада чинеба келемар 280 агъзур манатдай са касдиз маса гана, пулдин такьатар лагьайтIа, хсуси игьтияжриз харжна. Фермердиз келемар чIур хьанвай лагьана хабар гана.

И дуьшуьшдин гьакъиндай РФ-дин УК-дин “Лутувал”  статьядай уголовный дело къарагъарнава.

Гьазурайди — Агьмед Магьмудов