И йикъара СтIал Сулейманан райондин бязи хуьрера тамамдаказ ва пулсуздаказ агьалийрин кIвалерив тIебии газ агакьарунин (догазификация) месэлайриз талукь яз жемятдин гуьруьшар кьиле фена, хабар гузва райондин информациядин центради.
Абура “ЖКХ ва аваданламишун” МКУ-дин директордин заместитель Икрам Нежведилова, муниципалитетдин кьилин пешекар Жабраил Агъарзаева, хуьрерин администрацийрин кьилери ва къуллугъчийри иштиракна.
Гуьруьшрин асул макьсад агьалийрин иарада гъавурда твадай кIвалах кьиле тухуникай, тIал алай месэлаяр винел акъудуникай ва абур гьялуникай ибарат тир.
Къейд ийин, Россиядин Президентдин тапшуругъдалди уьлкведа газдин линияр гъанвай хуьрера газламиш тавуна амай кIвалерив ам агакьарунин программа уьмуьрдиз кечирмишзава. Адан сергьятра аваз агьалийрин кIвалер алай чилерин участокрин сергьятрив газ пулсуздаказ агакьарун лазим я. Президентдин тапшуругъдалди, рикIел хкин, сифтедай вахтуналди яз кьабулай и программа гила вахтунин сергьят алачирди хьанва.
Зугьрабахуьруьн ва ЦIийи Мамрачрин агьалийри программада иштиракуниз талукь суалар гана. ЦIийи Мамрачрин хуьруьз газ и мукьвара гъанвайди я. РД-дин Кьил Сергей Меликован тапшуругъдалди региондин бюджетдин гьисабдай ина 14 километрдилай гзаф яргъивал алай газдин линия туькIуьрнава. Ам ишлемишиз къведай йисуз башламишдайвал я.
Кьезилвилер авай агьалийривай пулсуздаказ газламишунин программада иштиракиз ва чпин кIвалерив тIебии газ агакьарунин карда хьанвай харжияр пулунин такьатралди эвез хъийиз жеда.
Гуьруьшрал малумарайвал, райондин и месэладиз талукь рекьерин ва АСП-дин пешекарар пулсуздаказ газламишунин программада иштиракун патал арзаяр гьазурунин ва и карда агьалийриз лазим куьмекар гуз гьазур я.
«Лезги газет»
