Чпин гьакъисагъ зегьметдалди инсанриз яшайишдинни уьмуьрдин няметар гъайи, гьа са вахтунда жемятрин патай лайихлу гьуьрмет къазанмишай ксар чи хуьрера тIимил авач. Дяведин, зегьметдин ветеран, Кеферпатан Кавказдин республикайрин муаллимрин 1-съезддин делегат хьайи Гьажиев Мегьамедан хизан Куьрхуьрел гьуьрмет авай, истеклубурун жергедай я. 1940-йисуз и хизанда эркек велед хьана. Адал Максим тIвар эцигна.
Хуьруьн мектебда ада 7-классдал кьван кIелна. Ахпа Дербентдин И.В.Сталинан тIварунихъ галай юкьван мектебда кIелун давамарна. ДГУ-дин физикадинни математикадин факультетда хъсандиз кIел-завай гада 1957-1958-йисара студентринни комсомолрин отряддик кваз Кустанайдин областдиз фена. А вахтара комсомолринни студентрин дестейри эцигунрал, техилар, емишар, салан майваяр кIватIиз, герек маса кIвалахрани екез куьмекар гудай. М.Гьажиева хам чилерални кIвалахна, абур кардик кутун патал активвилелди иштиракна. И важиблу крарай адаз “Хам чилер гьялунай” медаль ганай.
Университетдилай гуьгъуьниз М. Гьажиева са йисуз Кьурагь райондин Ашахуьруьн 8 йисан мектебда кIвалахна. Армиядин жергейриз эвер гайила, ракетайрин частара хъсандиз къуллугъна, спортдал машгъул хьана, комсомолдин кIвалахар тешкилна. Армиядай ам младший лейтенантдин чинда аваз хтана.
Зегьметда лигимвал, тешкиллувилин бажарагъ артух хьанвай пешекар 1964-йисуз КIварчагърин 7 йисан мектебдин директорвиле тайинарна. Ина ада комсомолдин ва тешкилдай кIвалах хейлин хъсанарна, цIийивилер туна. Адан тешкилатчивилин бажарагъ фикирда кьуна, партиядин райкомди Максим Гьажиев ВЛКСМ-дин Кьасумхуьруьн райкомдин 2-секретарвиле хутахна. Ада са тIимил вахтунда ВЛКСМ-дин обкомда ва краевой школадани кIвалахна. Инрани ада вич гъавурдик квай, жегьилрихъ галаз кIвалах тешкилиз чидай, алакьунар ва гележег авай кас тирди къалурна. Ихьтин ерияр гьисаба кьуна, Максим Мегьамедович ВЛКСМ-дин Кьасумхуьруьн райкомдин 1-секретарвиле тайинарна. Им 1965-йис тир. Ада райондин комсомолдин кIвалахда хейлин дегишвилер, цIийивилер тунай. Комсомолринни жегьилрин цIудалай виниз бригадаяр, жегьилрин зегьметчи коллективар арадал гъана, мектебра къуьрер хуьдай кьилдин дестеяр тешкилнай. Къуьрерин як гьукуматдизни вахканай. Комсомолринни жегьилрин ва производственный бригадайри майишатрин кIвалахар вилик тухунин, бегьерлувал хкажунин карда активвал къалуриз хьана. ИкI, райондин комсомол организация республикада хъсанбурукай сад хьана. Гьа са вахтунда районда физкультурадинни спортдин, художественный самодеятельностдин крарни вини дережадиз хкажна, чкайрал комсомолдин сифтегьан организацийрин кIвалахар жанлу авуна. И серенжемри ам вични лигимарна. Ихьтин крарай 1970-йисуз адаз ДАССР-дин Верховный Советдин Президиумдин Гьуьрметдин грамота гана.
1972-йисалай Максим Мегьамедовича райондин халкьдин контролдин комитетдин председатель яз кIвалахна. Вичин алакьунар ада и къуллугъдални къалурна. Халкьдин девлетдиз гъил яргъи ийизвайбурун вилик пад кьуна. 1989-йисуз Максим Мегьамедович КПСС-дин райкомдин 2-секретарвиле хкяна. Кьве йисалай ам “Самурский” совхоздин директорвилиз рекье туна. Саки 6 йисуз ада майишат идара авуна. Райондин ва республикадин вилик лайихлувилерай адаз “Дагъустан Республикадин муниципальный къуллугъдин лайихлу работник” лагьай тIвар, “Гьакъисагъ зегьметдай”, “Зегьметдин ветеран” медалар гана.
Райсудин Набиев
