Мукьвара Дербентда композитор Керимхан Бабаеван уьмуьрдиз ва яратмишунриз талукьарнавай ктаб чапдай акъатна. Лезги композитор дидедиз хьайидалай инихъ 80 йис тамам хьунихъ галаз алакъалу яз туькIуьрнавай ктабдал адан руш Зульфия Бабаевади ва медениятдик пай кутунвай ва и кар исятдани давамарзавай векилрикай халкьдиз малуматар раижзавай мухбир Эдуард Ашурагъаева зегьмет чIугунва.
Мегьарамдхуьруьн райондин къансавхуьруьнви Керимхан 1939-1992-йисара яшамиш хьана. Ада училище, вуз куьтягьна, жуьреба-жуьре жавабдар къуллугъар кьилиз акъудна. Адан хейлин манияр “Дагъустан” ГТРК-дин къизилдин фондуна хуьзва.
Ктабда К.Бабаеван уьмуьрдикай, яратмишунрикай, хизандикай, багърийрикай хейлин малуматар ава. Идалайни гъейри, ана халкьдин арада машгьур ксари, танишри, мукьва-кьилийри композитордикай кхьенвай макъалаярни, рикIел хкунарни гьатнава. Ктабдин метлеб умумиламишайтIа, композитордин гьакъиндай ихьтин фикир лугьуз жеда: ам умун, регьимлу къилихрин инсан, халкьдин медениятдихъ рикI кайи бажарагълу пешекар тир.
Къейд ийин хьи, Э.Ашурагъаева алай йисан сифте кьилера “Дагъустандин композиторар” тIвар алаз вичин сад лагьай ктабни чапдай акъудна. Ам исятдани лезги медениятдин лайихлу векилрикай делилар кIватIунин гьерекатрик ква. Агалкьунар хьурай вичихъ!
К.Ферзалиев
