5-ноябрдиз Коми Республикадин Воркута шегьерда женгинин самбодай чемпионат кьиле фена. Ана женгининни спортдин самбодай вердишвилер къачузвай саки 200 спортсменди иштиракна.
Чемпионатдин иштиракчийрин арада Ухта шегьерда кардик квай “Чемпион” тIвар алай клубда тренер Ислам Абдулгъаниеван гъилик самбодал машгъул жезвай чи кьуд ватанэгьлини авай. Абурукай Ислам Абдулгъаниева (Белиж поселок), Мелик Абдуллаева (Уружба), Фарид Муслимова (Гъепцегьар) чпин заланвилин категорийрай инанмишвилелди кIвенкIвечи чкаяр кьуна. Ахцегьай тир Артур Гьасанов лагьайтIа, 2-чкадиз лайихлу хьана.
Бине Белиждай тир, фадлай Ухта шегьерда яшамиш жезвай Ислам Абдулгъаниев гъилералди кукIунай кьве сеферда Урусатдин чемпионатдин призер, спортдин мастер, РФ-дин кубокдин сагьиб, боксдай, женгинин самбодай хейлин турниррин гъалибчи, Артур Гьасанов каратэдай Европадин чемпион ва спортдин мастер я.
“Чемпион” клуб кардик кваз кьве йис я. Ана 80-дав агакьна жегьилри женгинин самбодай ва гъилералди кукIунай вердишвилер къачузва. Спортсменри Коми Республикада кьиле физвай акъажунра датIана иштиракзава, кIвенкIвечи чкаяр кьазва.
Алай йисуз Ислам Абдулгъаниева Parma Fights тешкилатди ММА-дай кьиле тухудай турнирда пешекарвилин женгина иштиракун патал гьазурвилер аквазва. Чи Мурад Исламахъ ва “Чемпион” клубда спортдал машгъул жезвай чи вири ватанэгьлийрихъ агалкьунар хьун я.
Къагьриман Ибрагьимов
