Эхиримжи вахтара чал агакьзавай хабарар коронавирусдихъ галаз женг чIугунихъ галаз алакъалубур я. Виринра хьиз, Сулейман-Стальский райондани и завалдикай хуьн патал жуьреба-жуьре серенжемар кьабулзава: махсус парталар алукIна, дараматар, куьчеяр дарманралди дезинфекция ийизва, маса къайдайра хатасузвал хуьнин кIвалахар кьиле физва.
Гьа са вахтунда экономикадин месэлаярни акъвазарнавач: районда эцигунар ва ремонтдин кIвалахар давам жезва. Кьилди къачуртIа, КIварчагъ дереда яшайишдин гьалар гегьеншарун патал рекьера къир цаз эгечIнава. Алай вахтунда кьве магьле вижевай гьалдиз гъанва.
Зи фикирдалди, КIварчагърин хуьр Сулейман-Стальский райондин гуьрчег хуьрерикай сад я. А хуьряй зурба спортсменар, тIвар-ван авай кьегьал рухваяр акъатнава. Арада 1-2 километрдин мензил аваз, и дереда кьуд хуьр экIя хьанва: КIварчагъар, Зизикар, НуьцIуьгъар ва Экенар. КIварчагърин хуьруьхъ галаз зун 2018-йисуз мукьувай таниш хьайиди я. Себеб ам тир хьи, чун университетдай гьа дередин нугъатар ахтармишун патал диалектологиядай практикадиз ракъурнавай.
Дереда вичихъ чIехи тарих авай дагьарар, «Къванцин булах» тIвар алай къайи, гьамга булахни ава. Булахдикай рахайла, зи рикIел Дагъустандин халкьдин шаир Байрам Салимован «Рахазва булах» лугьудай шиирдай са бенд рикIел хтана:
Рахазва булах йифди кушкушиз,
Вич-вичихъ галаз, дагъларихъ галаз.
Вичин къайивал авахьзавай циз
Гуз, физ гьазур я ам гзаф яргъаз…
Хуьруьнвияр мал-къара хуьнал, саларин, багъларин кIвалахар авунал машгъул я. А патара иллаки яр-емиш пара жеда, заз чиз, ципицIрин чIереярни пIинийрин тарар авачир кIвал анай бажагьат жагъида. Къуй вун мадни авадан хьуй, КIварчагърин хуьр!
Жемиля Ризаева,
ДГУ-дин филологиядин
факультетдин 4-курсунин студентка
